അടിമാലി: പിതാവിന്റെ ആക്രമണത്തില് നവജാത ശിശു മരിക്കുകയും അമ്മയ്ക്ക് ഗുരുതരമായി പരിക്കേല്ക്കുകയും ചെയത് സംഭവത്തില് കാട്ടിലേക്ക് ഓടി മറഞ്ഞ 12 കാരനെ തേടി മൂന്നാര് ഡിവൈഎസ്പി എത്തി. ഏറെ നേരം തെരഞ്ഞിട്ടും കുട്ടിയെ കണ്ടെത്താനായില്ല.
വാളറ പാട്ടയിടുമ്പ് കുടിയില് പിതാവിന്റെ ക്രൂരമര്ദ്ദനത്തിനിരയായി കുഞ്ഞ് മരിച്ചതോടെയാണ് മറ്റ് നാലുകുട്ടികളെ ശിശുക്ഷേമ സമിതി ഏറ്റെടുക്കാന് തീരുമാനിച്ചത്. 3 കുട്ടികളെ ഏറ്റെടുത്തെങ്കിലും മൂത്ത കുട്ടി ഓടി കാട്ടില് കയറുകയായിരുന്നു.
കുടിയിലെ തന്നെ താമസക്കാരായ പിതാവ് രവിയുടെ മാതാപിതാക്കള്ക്കൊപ്പം കഴിയുന്ന രതീഷ്(12)ആണ് വനത്തില് ഒളിച്ച് കഴിയുന്നത്. പരിചിതരല്ലാത്ത ആരെക്കണ്ടാലും കുട്ടി വനത്തിനുള്ളിലേക്ക് ഓടിമറയും. അന്വേഷണ ഉദ്യോഗസ്ഥരായ മൂന്നാര് ഡിവൈഎസ്പി കെ എന് അനിരുദ്ധനും, അടിമാലി സിഐ ടി യു യൂനസും ഇന്നലെ കുടിയിലെത്തിയപ്പോഴും അവസ്ഥ മറിച്ചായിരുന്നില്ല. വല്ലപ്പോഴുമൊക്കെ ആഹാരം കഴിയ്ക്കാനിറങ്ങിവരുന്ന കുട്ടിയെ പിടികൂടി തങ്ങള്ക്ക് കൈമാറാന് ബന്ധുക്കളെ ഏര്പ്പാട് ചെയ്തതായി മൂന്നാര് ഡിവൈഎസ്പി കെ എന് അനിരുദ്ധന് പറഞ്ഞു. ഇതിനിടെ കോട്ടയം മെഡിക്കല് കോളേജില് ചികില്സയിലുള്ള വിമലയുടെ ആരോഗ്യസ്ഥതിയില് നേരിയ പുരോഗതിയുള്ളതായി അന്വേഷണ ഉദ്യോഗസ്ഥര് പറഞ്ഞു.
