മാവേലിക്കര: പെരിങ്ങലിപ്പുറം ശ്രീ ഭുവനേശ്വരി ക്ഷേത്രത്തില് അതിക്രമിച്ചു കടന്ന സിപിഎം-ഡിവൈഎഫ്ഐ സംഘം ഭജന അലങ്കോലപ്പെടുത്തുകയും ക്ഷേത്രഭാരവാഹികളെയും ഭക്തരെയും മര്ദ്ദിച്ചു. സാരമായി പരിക്കേറ്റ രാഹുല്, അരുണ്, ശ്യാംകൃഷ്ണന്, ആനന്ദ് എന്നിവരെ തട്ടാരമ്പലം സ്വകാര്യ ആശുപത്രിയില് പ്രവേശിപ്പിച്ചു.
ക്ഷേത്രത്തില് നടന്നു വരുന്ന ഭാഗവത സപ്താഹയജ്ഞത്തിന്റെ രണ്ടാം ദിവസം കോഴിക്കോട് പ്രശാന്ത് വര്മ്മയുടെ നേതൃത്വത്തില് നടന്ന ഭജനയ്ക്കു നേരെയാണ് ആക്രമണം നടന്നത്.
ചൊവ്വാഴ്ച രാത്രി പത്തുമണിയോടെയായിരുന്നു സംഭവം. ഭജന ആരംഭിച്ചപ്പോള് തന്നെ ക്ഷേത്രത്തിന്റെ മുന്നില് ഡിവൈഎഫ്ഐ സംഘം സംഘടിച്ചിരുന്നു. ഭജനയുടെ അവസാന ഘട്ടത്തിലേക്ക് കടന്നപ്പോള് തങ്ങള്ക്കിഷ്ടമില്ലാത്ത പാട്ടു പാടിയെന്ന് ആരോപിച്ചാണ് ഡിവൈഎഫ്ഐ സംഘം ക്ഷേത്രത്തിലേക്ക് കടന്നു കയറി കസേരകള് തല്ലി ഒടിക്കുകയും മൈക്ക് സെറ്റിന് കേടുപാടുകള് വരുത്തുകയും ചെയ്തു.
ഇതിനെ ചോദ്യം ചെയ്ത ക്ഷേത്ര ഭാരവാഹികളെയും ഭക്തരെയും അക്രമിസംഘം മര്ദ്ദിച്ചു. സ്ഥലത്തുണ്ടായിരുന്ന പോലീസിന്റെ സമയോചിതമായ ഇടപെടല് മൂലമാണ് കൂടുതല് അനിഷ്ട സംഭവങ്ങള് ഒഴിവായത്. പോലീസുകാര്ക്കു നേരെയും അക്രമം നടത്താന് ഡിഫിക്കാര് ശ്രമിച്ചു. ”നീയൊക്കെ വെറും ലോക്കലാടാ, ഞങ്ങള് വിളിച്ചാല് ഡിജിപി ഇവിടെ എത്തുമെന്നായിരുന്നു പോലീസിനു നേരെയുള്ള ആക്രോശം”.
പോലീസിന്റെ ഇടപെടലില് ക്ഷേത്രത്തിനു പുറത്തേക്ക് അക്രമി സംഘം മാറിയെങ്കിലും രാത്രി വൈകും വരെ മറ്റു സ്ഥലങ്ങളില് നിന്നുള്ള ഡിഫിക്കാരെ വിളിച്ചു വരുത്തി ക്ഷേത്ര ഭാരവാഹികള്ക്കെതിരെ ഭീഷണി മുഴക്കി.
അക്രമങ്ങള്ക്ക് നേതൃത്വം നല്കിയ ഡിവൈഎഫ്ഐക്കാര്ക്കെതിരെ കേസ് എടുത്തതായും പ്രദേശത്ത് പോലീസ് പരിശോധന ശക്തമാക്കിയതായും മാന്നാര് പോലീസ് പറഞ്ഞു.
മുന്പും നിരവധി തവണ ഡിവൈഎഫ്ഐ സംഘം ക്ഷേത്രത്തിനു നേരെ അക്രമം നടത്തിയിട്ടുണ്ട്. ശ്രീകൃഷ്ണ ജയന്തി ദിവസം ബാലഗോകുലം ഘോഷയാത്ര വരുമ്പോള് ക്ഷേത്രത്തിനു മുന്പില് കള്ളുകുടം കെട്ടിയിട്ട് അടിച്ചു പൊട്ടിക്കുന്നതുള്പ്പെടെയുള്ള പ്രവര്ത്തികളാണ് സിപിഎം-ഡിവൈഎഫ്ഐക്കാര് ഇവിടെ ചെയ്യുന്നത്.
പ്രദേശത്ത് നിരന്തരം ഹൈന്ദവ ആചാര അനുഷ്ടാനങ്ങള്ക്കു നേരെ സിപിഎം ഒത്താശയോടെ ഡിവൈഎഫ്ഐക്കാര് നടത്തുന്ന അക്രമങ്ങള്ക്കെതിരെ വ്യാപക പ്രതിഷേധമാണ് ഉയര്ന്നിരിക്കുന്നത്. ക്ഷേത്രത്തിനു നേരെ കയ്യേറ്റം നടത്തിയവര്ക്കെതിരെ കര്ശന നിയമനടപടികള് സ്വീകരിച്ചില്ലെങ്കില് ശക്തമായ പ്രക്ഷോഭ പരിപാടികള് സംഘടിപ്പിക്കുമെന്ന് വിവിധ ഹൈന്ദവ സംഘടനാ നേതാക്കള് അറിയിച്ചു.
