മോസ്കോ: കരിങ്കടലില് തകര്ന്നു വീണ റഷ്യയുടെ ടിയു 154 എന്ന സൈനിക വിമാനത്തിന്റെ ബ്ലാക്ക് ബോക്സ് കണ്ടെടുത്തു. അപകടമുണ്ടായത് വിമാനത്തിന്റെ സാങ്കേതിക തകരാറാണോയെന്ന് ഉള്പ്പെടെയുളള കാര്യങ്ങളില് നിഗമനത്തിലെത്താന് അന്വേഷണ സംഘത്തെ ഇത് സഹായിക്കുമെന്ന് റഷ്യന് അധികൃതര് വ്യക്തമാക്കി.
കഴിഞ്ഞ ദിവസമാണ് റഷ്യന് പ്രതിരോധമന്ത്രാലയത്തിന്റെ ടിയു 154 എന്ന ജെറ്റ് വിമാനം കരിങ്കടലില് തകര്ന്നു വീണത്. മോസ്കോയില് നിന്ന് തിരിച്ച വിമാനം ഇന്ധനം നിറയ്ക്കാനായി കരിങ്കടലിന്റെ തീരത്തുളള സോചി നഗരത്തിലെ ആഡ്ലെര് വ്യോമതാവളത്തില് ഇറങ്ങിയിരുന്നു. ഇതിന് ശേഷമുളള യാത്രയിലായിരുന്നു അപകടം.
റഷ്യന് മിലിട്ടറി മ്യൂസിക് സ്ക്വാഡിലെ 64 അംഗങ്ങളും മാദ്ധ്യമപ്രവര്ത്തകരും അടക്കം 92 പേരായിരുന്നു വിമാനത്തില് ഉണ്ടായിരുന്നത്. സിറിയയിലെ ലതാകിയയിലേക്കുളള യാത്രയിലായിരുന്നു വിമാനം. പറന്നുയര്ന്ന് 20 മിനിറ്റിനുളളില് വിമാനം റഡാറില് നിന്ന് അപ്രത്യക്ഷമാകുകയായിരുന്നു. എയര് ട്രാഫിക് കണ്ട്രോള് റൂമുമായി പൈലറ്റ് നടത്തിയ അവസാന ആശയവിനിമയത്തിലും സാങ്കേതിക തകരാറിനെക്കുറിച്ച് ഒന്നും പറഞ്ഞിരുന്നില്ലെന്നാണ് റഷ്യന് മാദ്ധ്യമങ്ങള് പുറത്തുവിടുന്ന റിപ്പോര്ട്ട്.
അനുവദനീയമായ പരിധിയില് കൂടുതല് ആളുകള് വിമാനത്തില് ഉണ്ടായിരുന്നതാണ് അപകടകാരണമെന്നും വാദങ്ങള് ഉയര്ന്നിരുന്നു.
