കൊച്ചി: സീറോ മലബാര് സഭയുടെ കീഴിലുള്ള എഴുപുന്ന സെന്റ് റാഫേല്സ് പള്ളിയുടെ അള്ത്താരയുടെ മേല്ക്കൂര തകര്ന്നുവീണത് മൂടിവെക്കാന് ശ്രമം നടക്കുന്നതായി സെന്റ് റാഫേല്സ് ചര്ച്ച് ലേമെന്സ് അസോസിയേഷന്. തിരുക്കര്മ്മങ്ങള് നടക്കുന്ന ഷെഡിനു മുകളിലേക്കാണ് മേല്ക്കൂര തകര്ന്നുവീണത്. പ്രാര്ത്ഥനയ്ക്കായി ആളുകള് ഇല്ലാതിരുന്നതിനാല് വന് അപകടം ഒഴിവായി. എന്നാല് ഈ വാര്ത്ത എറണാകുളം അങ്കമാലി രൂപത മറച്ചുവെക്കുകയായിരുന്നുവെന്നും അസോസിയേഷന് ഭാരവാഹികള് ആരോപിക്കുന്നു.
1859ലാണ് ദേവാലയം നിര്മ്മിച്ചത്. നിലവില് ഈ ദേവാലായം ഉള്പ്പെടുന്ന ഭൂമിയും പാറായില് കുടുംബത്തിന്റെ പേരിലാണ്. 2013ല് കേരള പുരാവസ്തു വകുപ്പിന്റെ മേല്നോട്ടത്തില് അതിരൂപത പള്ളിയുടെ പുനരുദ്ധാരണം നടത്തണമെന്ന് കോടതി വിധിയുണ്ടായിട്ടും അതിരൂപത യാതൊരു പുനരുദ്ധാരണവും നടത്തിയട്ടില്ല. രണ്ട് കോടി അഞ്ച് ലക്ഷം രൂപ ഒരുമിച്ച് അടച്ചാല് മാത്രമേ നിര്മ്മാണം ആരംഭിക്കാന് കഴിയുകയുള്ളൂവെന്ന നിലപാടിലാണ് എറണാകുളം അങ്കമാലി അതിരൂപത.
പള്ളിയുടെ മേല്ക്കൂര തകര്ന്നിട്ട് എട്ടുവര്ഷം കഴിഞ്ഞിട്ടും നിര്മ്മാണം ആകാത്തതിനാല് സമീപത്തെ താത്കാലിക ഷെഡിലാണ് കുര്ബാന അടക്കമുള്ള തിരുക്കര്മ്മങ്ങള് നടക്കുന്നതെന്നും കൂട്ടിച്ചേര്ത്തു. റെജി റാഫേല്, ജോര്ജ് മാത്യു, കെ.എന്. തങ്കച്ചന്, എം.കെ. വക്കച്ചന് എന്നിവര് പത്രസമ്മേളനത്തില് പങ്കെടുത്തു.
