പയ്യന്നൂര്: തായിനേരി വെള്ളാരങ്ങര ഭഗവതി ക്ഷേത്രത്തിലെ പെരുങ്കളിയാട്ട മഹോത്സവം 30 മുതല് ജനുവരി 2 വരെ നടക്കും. 95 വര്ഷത്തിന് ശേഷമാണ് ഇവിടെ പെരുങ്കളിയാട്ട മഹോത്സവം നടക്കുന്നത്. പൗരാണികമായ ആചാരങ്ങള് കൈവിടാതെയും പുതുതലമുറയുടെ വൈവിധ്യങ്ങളായ ആഘോഷങ്ങളും കോര്ത്തിണക്കിയാണ് കളിയാട്ടം കൊണ്ടാടുന്നത്.
നാലു ദിവസങ്ങളിലായി നടക്കുന്ന കളിയാട്ട മഹോത്സവത്തില് ഉത്തര മലബാറിലെ ലക്ഷക്കണക്കിന് ഭക്തര് പങ്കെടുക്കും. ഉത്സവത്തിന്റെ ഭാഗമായുള്ള വരച്ചുവെക്കല് ചടങ്ങ് 26ന് രാവിലെ 10 മണിക്ക് നടക്കും. 27ന് വൈകുന്നേരം 3.30ന് പെരുമ്പ മുത്തപ്പന് ക്ഷേത്രത്തില് നിന്നും കലവറ നിറക്കല് ഘോഷയാത്ര, 29ന് വൈകുന്നേരം 3.30ന് വിശ്വകര്മ്മ ക്ഷേത്ര കൂട്ടായ്മയുടെ നേതൃത്വത്തില് സുബ്രഹ്മണ്യ സ്വാമിക്ഷേത്ര പരിസരത്തുനിന്നും എടുത്തുപിടിച്ച് വരവ്, 30ന് രാവിലെ 7ന് മാടായിക്കാവില് നിന്നും സുബ്രഹ്മണ്യ ക്ഷേത്രത്തില് നിന്നും ദീപവും തിരിയും കൊണ്ടുവരുന്നതോടെ ഉത്സവത്തിന് തുടക്കമാകും. വൈകുന്നേരം 4.30ന് മുച്ചിലോട്ട് ഭഗവതി ക്ഷേത്രത്തില് നിന്നും എടുത്തുപിടിച്ച് വരവ് വെളളാരങ്ങര ഭഗവതിയുടെ ഉച്ചത്തോറ്റം, എഴുന്നള്ളത്ത്, 7ന് മൂവര്തോറ്റം, 31ന് രാവിലെ 5 ന് അങ്കക്കുളങ്ങര ഭഗവതി, 6.30ന് കുറത്തിയമ്മ, തുടര്ന്ന് രക്തചാമുണ്ഡി, കുണ്ടോര് ചാമുണ്ഡി, വിഷ്ണുമൂര്ത്തി, ഗുളികന്, വൈകുന്നേരം 3.30ന് ഉച്ചത്തോറ്റം, 4.30ന് കുറിഞ്ഞി ക്ഷേത്രത്തില് നിന്നും എടുത്തുപിടിച്ചുവരവ്, രാത്രി 7ന് കന്നിക്കൊരുമകന് വെള്ളാട്ടം, ജനുവരി 1ന് രാവിലെ മുതല് കന്നിക്കൊരുമകന്, അങ്കക്കുളങ്ങര ഭഗവതി, കുറത്തിയമ്മ, രക്തചാമുണ്ഡി, കുണ്ടോര് ചാമുണ്ഡി, ബാലി, വിഷ്ണുമൂര്ത്തി ഗുളികന് തെയ്യക്കോലങ്ങള്, 2ന് പുലര്ച്ചെമുതല് കൊടിയിലത്തോറ്റം, കന്നിക്കൊരുമകന് ദൈവം, പുതിയ ഭഗവതി, അങ്കക്കുളങ്ങര ഭഗവതി, കുറത്തിയമ്മ, രക്തചാമുണ്ഡി, ബാലി, ബാലിതെയ്യം, എഴുന്നള്ളത്ത്, ചാമുണ്ഡി, ഗുളികന്, വിഷ്ണുമൂര്ത്തി തെയ്യക്കോലങ്ങള് എന്നിവയും ഉച്ചക്ക് 12ന് പ്രധാന ദേവതയായ വെള്ളാരങ്ങര ഭഗവതിയുടെ തിരുമുടിയും ഉണ്ടായിരിക്കും.
ക്ഷേത്രം നടപ്പന്തല് 22ന് വൈകുന്നേരം 5ന് ഐജി ദിനേന്ദ്ര കശ്യപ് ഉദ്ഘാടനം ചെയ്യും. സുവനീര് പ്രകാശനം 26ന് വൈകുന്നേരം 5ന് നോവലിസ്റ്റ് സി.വി.ബാലകൃഷ്ണന് നിര്വ്വഹിക്കും. 27ന് വൈകുന്നേരം 5ന് നാട്ടുപൈതൃകം പരിപാടി ഫോക്ലോര് അക്കാദമി സെക്രട്ടറി എം.കെ.നമ്പ്യാരും 28ന് നടക്കുന്ന സാംസ്കാരിക സദസ്സ് പി.കെ.ശ്രീമതി എംപിയും 29ന് 5ന് നടക്കുന്ന കവിയരങ്ങ് എം.രാജഗോപാലന് എംഎല്എയും ഉദ്ഘാടനം ചെയ്യും. 30ന് നടക്കുന്ന സാംസ്കാരിക സമ്മേളനം മന്ത്രി കടകമ്പള്ളി സുരേന്ദ്രനും ഉദ്ഘാടനം ചെയ്യും.
31ന് മാനവീയം സൗഹൃദ സദസ്സ് വൈകുന്നേരം 6ന് മന്ത്രി ഇ.ചന്ദ്രശേഖരന് ഉദ്ഘാടനം ചെയ്യും. റിച്ചാര്ഡ് ഹേ എംപി, പി.കരുണാകരന് എംപി എന്നിവര് മുഖ്യാതിഥികളായിരിക്കും. 1ന് നടക്കുന്ന സാംസ്കാരിക സമ്മേളനം ബിജെപി നേതാവ് ഒ.രാജഗോപാല് എംഎല്എ ഉദ്ഘാടനം ചെയ്യും.
