ചെന്നൈ: മലയാളി കരുണ് നായരുടെ ട്രപ്പിള് സെഞ്ചുറിയുടെ കരുത്തില് ഇംഗ്ലണ്ടിനെതിരായ അഞ്ചാമത്തെയും അവസാനത്തെയും ക്രിക്കറ്റ് ടെസ്റ്റിന്റെ ഒന്നാം ഇന്നിങ്ങ്സില് ഇന്ത്യക്ക് റെക്കോര്ഡ് സ്കോര്. കരുണ് നായരുടെ (303 പുറത്താകാതെ) യും ഓപ്പണര് ലോകേഷ് രാഹുലിന്റെയും (199) തകപ്പന് പ്രകടനങ്ങളുടെ കരുത്തില് ഇന്ത്യ ആദ്യ ഇന്നിങ്ങ്സില് 7 വിക്കറ്റ് 759 റണ്സ് അടിച്ചുകൂട്ടി ഡിക്ലയര് ചെയ്തു.
ടെസ്റ്റ് ക്രിക്കറ്റിന്റെ ചരിത്രത്തില് ഇന്ത്യയുടെ ഏറ്റവും ഉയര്ന്ന സ്കോറാണ് ഇന്നലെ നേടിയത്. 2009ല് ശ്രീലങ്കയ്ക്കെതിരെ മുംബൈയില് നേടിയ 726 റണ്സിന്റെ റെക്കോര്ഡാണ് ഇന്ത്യ തിരുത്തിയത്. അവസാന ദിനം പിച്ച് സ്പിന്നിനെ വഴിവിട്ടു സഹായിച്ചാല് ഇന്ത്യയ്ക്ക് വിജയത്തിലെത്താം.
ഇംഗ്ലണ്ടിന്റെ ആദ്യ ഇന്നിങ്സ് 477 റണ്സിലവസാനിച്ചിരുന്നു. ഇതോടെ ഒന്നാം ഇന്നിങ്ങ്സില് ഇന്ത്യ 282 റണ്സിന്റെ ലീഡ് നേടി. തുടര്ന്ന് രണ്ടാം ഇന്നിങ്ങ്സ് ആരംഭിച്ച ഇംഗ്ലണ്ട് നാലാം ദിവസത്തെ കളിനിര്ത്തുമ്പോള് വിക്കറ്റ് നഷ്ടപ്പെടാതെ 12 റണ്സെടുത്തു. 9 റണ്ണുമായി ജെന്നിങ്സും മൂന്ന് റണ്ണുമായി അലിസ്റ്റര് കുക്കും ക്രീസില്.
നാല് വിക്കറ്റ് നഷ്ടത്തില് 391 റണ്സെന്ന നിലയില് നാലാം ദിവസത്തെ കളി തുടങ്ങിയ ഇന്ത്യ മലയാളി താരം കരുണ് നായരുടെ ട്രിപ്പിള് സെഞ്ച്വറിയുടെ മികവിലാണ് റെക്കോര്ഡ് സ്കോറിലെത്തിയത്. രവിചന്ദ്ര അശ്വിന്, രവീന്ദ്ര ജഡേജ എന്നിവരുടെ അര്ദ്ധസെഞ്ചുറികളും ഓപ്പണര് ലോകേഷ് രാഹുലിന്റെ 199 റണ്സും ഇന്ത്യന് ഇന്നിങ്ങ്സിന് കരുത്തേകി. മൂന്ന് സെഞ്ചുറി കൂട്ടുകെട്ടുകളാണ് കരുണ് നായര് പടുത്തുയര്ത്തിയത്. ആറാം വിക്കറ്റില് അശ്വിനുമായി ചേര്ന്ന് 181 റണ്സും നാലാം വിക്കറ്റില് ലോകേഷ് രാഹുലുമായി ചേര്ന്ന് 161 റണ്സും ഏഴാം വിക്കറ്റില് രവീന്ദ്ര ജഡേജയുമായി ചേര്ന്ന് 138 റണ്സും നേടി. അശ്വിന് 67 റണ്സും ജഡേജ 51 റണ്ണും നേടി.
ഇന്നലെ ഇന്നിങ്ങ്സ് ആരംഭിച്ച ഇന്ത്യക്ക് ആദ്യ വിക്കറ്റ് നഷ്ടമായത് സ്കോര് 435-ല് എത്തിയപ്പോള്. 17 റണ്സുമായി ബാറ്റിങ്ങ് ആരംഭിച്ച മുരളി വിജയ് 12 റണ്സ് കൂടി കൂട്ടിച്ചേര്ത്ത് ഡോസന്റെ പന്തില് വിക്കറ്റിന് മുന്നില് കുടുങ്ങി പുറത്തായി. ഇതോടെ ഇന്ത്യന് വാലറ്റത്തെ വേഗം മടക്കാമെന്ന കണക്കുകൂട്ടലിലായിരുന്നു ഇംഗ്ലീഷ് ബൗളര്മാര്. എന്നാല് കരുണിനൊപ്പം കരുണിനൊപ്പം അശ്വിനും ജഡേജയും മികച്ച ബാറ്റിങ്ങ് കാഴ്ചവെച്ചതോടെ ഇന്ത്യ കൂറ്റന് സ്കോറിലേക്ക് കുതിക്കുകയായിരുന്നു. ഇംഗ്ലണ്ടിനായി സ്റ്റുവര്ട്ട് ബ്രോഡും ഡോസണും രണ്ട് വിക്കറ്റുകള് വീതം വീഴ്ത്തി.
