അമ്പലപ്പുഴ: കിടപ്പാടം നഷ്ടപ്പെട്ട വര്ഷങ്ങളായി ക്യാമ്പുകളില് കഴിയുന്ന മത്സ്യത്തൊഴിലാളി കുടുംബങ്ങള് പഞ്ചായത്ത് ഓഫിസ് ഉപരോധിച്ചു. ഓഫീസ് കെട്ടിടത്തില് ഇരച്ചു കയറിയവര് ജീവനക്കാരെ ഉള്പ്പെടെ കെട്ടിടത്തില് പൂട്ടിയിട്ടു. ഇന്നലെ വൈകിട്ട് മൂന്നോടെ പുറക്കാട് പഞ്ചായത്ത് ഓഫീസില് ബിജെപിയുടെ ഗ്രാമപഞ്ചായത്തംഗം ബിന്ദു ഷാജിയുടെ നേതൃത്വത്തിലായിരുന്നു അധികാരികളുടെ കണ്ണുതുറപ്പിക്കുന്ന സമരം അരങ്ങേറിയത്.
പഞ്ചായത്തിലെ ഒന്ന്, പതിനെട്ട്, പതിനേഴ് വാര്ഡുകളിലെ നൂറ്റി പതിനാലോളം കുടുംബങ്ങളാണ് നാലുവര്ഷത്തോളമായി വിവിധ ദുരിതാശ്വാസ ക്യാമ്പുകളിലും, ബന്ധുവീടുകളിലും, വാടക കെട്ടിടങ്ങളിലുമായി കഴിയുന്നത്. എന്നാല് ഇവരുടെ പുനരധിവാസം കഴിഞ്ഞ യുഡിഎഫ് സര്ക്കാരും ഇപ്പോഴത്തെ എല്ഡിഎഫും അട്ടിമറിക്കുകയായിരുന്നു. ക്യാമ്പുകളില് നരകയാതന അനുഭവിക്കുന്ന കുടുംബങ്ങള് ബിന്ദു ഷാജിയുടെ നേതൃത്വത്തില് സംഘടിക്കുകയായിരുന്നു. മണിക്കൂറുകളോളം മുറിക്കുള്ളില് കുടുങ്ങിയ ജീവനക്കാരെ പുറത്തിറക്കാന് അമ്പലപ്പുഴ, പുന്നപ്ര, ഏ ആര് ക്യാമ്പ് എന്നിവിടങ്ങളില് നിന്നുള്ള പോലീസ് സംഘം സ്ഥലത്തെത്തി. ഡിവൈഎസ്പി ഷാജഹാന്റെ നേതൃത്വത്തില് ചര്ച്ച നടത്തിയെങ്കിലും ബന്ധപ്പെട്ടവര് വന്ന് തീരുമാനമാകാതെ കെട്ടിടം തുറക്കില്ല എന്ന് പ്രതിഷേധക്കാര് അറിയിക്കുകയായിരുന്നു.
സമരക്കാര് പൂട്ടിയ താഴു തകര്ത്ത് അകത്തു കയറാന് ആലപ്പുഴയില് നിന്ന് ഒരു യൂണിറ്റ് ഫയര്ഫോഴ്സിനേയും എത്തിച്ചിരുന്നു. എന്നാല് പൂട്ടു തകര്ക്കുകയോ പോലിസ് അകത്തു കയറുവാനോ ശ്രമം നടത്തിയാല് കൈക്കുഞ്ഞുങ്ങളുമായി കെട്ടിടത്തിന്റെ മുകളില് നിന്നും താഴേക്ക് ചാടുവാന് സത്രീകള് ഉള്പ്പെടെയുള്ളവര് തയാറായതോടെ പോലിസ് പിന്മാറുകയായിരുന്നു. കളകടര് സ്ഥലത്തില്ലാത്തതിനാല് വൈകിട്ട് അഞ്ചോടെ തഹസില്ദാര് മിനി എബ്രഹാം സ്ഥലത്ത് എത്തുകയും ബിജെപി നേതാക്കളുമായും, സമരക്കാരുമായും ചര്ച്ച നടത്തി. കളക്ടര് സ്ഥലത്തില്ലെന്നും ജനുവരി പതിനാലിന് വരികയുള്ളുവെന്നും തഹസീല്ദാര് അറിയിച്ചു. കളക്ടര് എത്തിയാലുടന് ചര്ച്ച നടത്തി പരിഹാരം ഉണ്ടാക്കുമെന്നും അവര് ഉറപ്പു നല്കി. ഇതോടെയാണ് ജീവനക്കാരെ മോചിപ്പിച്ചത്.
കഴിഞ്ഞ കുറെ ദിവസങ്ങളായി കോണ്ഗ്രസിന്റെ ജില്ലാ പഞ്ചായത്തംഗത്തിന്റെ നേത്യത്വത്തില് വീടു നഷ്ടപ്പെട്ട കുടുംബങ്ങളെ വീണ്ടും കബളിപ്പിക്കുന്ന തരത്തില് സമരം അരങ്ങേറിയിരുന്നു. ഇതോടെയാണ് ഇടതുവലതു മുന്നണികളുടെ തട്ടിപ്പിനെതിരെ മത്സ്യത്തൊഴിലാളികള് ബിജെപിയുടെ നേതൃത്വത്തില് സമരത്തിന് എത്തിയത്. ബിജെപി നിയോജക മണ്ഡലം വൈസ് പ്രസിഡന്റ് അനില് പാഞ്ചജന്യം, പഞ്ചായത്ത് കമ്മിറ്റി പ്രസിഡന്റ് അജു പാര്ത്ഥസാരഥി, എം.രാജന്, ഗ്രാമ പഞ്ചായത്തംഗം ആരോമല്, ബൂത്ത് പ്രസിഡന്റ് സുനില്കുമാര് തുടങ്ങിയവര് ചര്ച്ചയില് പങ്കെടുത്തു.
