ആലപ്പുഴ: ജില്ലയില് മൂന്നു മാസത്തിനിടയില് എക്സൈസ് വകുപ്പ് 3,231 മിന്നല്പരിശോധന നടത്തിയതില് 758 അബ്കാരികേസുകളാണ് രജിസ്റ്റര് ചെയ്തത്. 904 പേര് പ്രതികളായ കേസുകളിലായി 853 പേര് ഇതിനകം അറസ്റ്റിലായിട്ടുണ്ട്. മദ്യത്തിന്റെ ഉല്പ്പാദനവും വിതരണവും തടയുന്നതിനുള്ള ജില്ലാതല ജനകീയ സമിതി യോഗത്തില് ആലപ്പുഴ ഡപ്യൂട്ടി എക്സൈസ് കമ്മിഷണര് എന്.എസ്. സലിംകുമാര് അവതരിപ്പിച്ച റിപ്പോര്ട്ടിലാണ് ഇക്കാര്യം വ്യക്തമാക്കുന്നത്.
ഈ കേസുകളിലായി 102.100 ലീറ്റര് ചാരായവും 454 ലീറ്റര് വിദേശമദ്യവും 3130ലീറ്റര് കോടയും 7.11 കിലോ കഞ്ചാവും 110.9 ലീറ്റര് അരിഷ്ടവും 188.5 ലീറ്റര് ബിയറും പിടികൂടിയിരുന്നു. ഇക്കാലയളവില് നടത്തിയ 8,367 വാഹനപരിശോധനകളിലായി വ്യാജമദ്യം കടത്തിയ 13 ബൈക്കുകളാണ് പിടിച്ചെടുത്തത്. രണ്ടു കാറും ഒരു ടാറ്റ എയ്സും പിടികൂടിയതില്പെടും.
വിവിധ കള്ളുഷാപ്പുകളിലായി 2,501 പരിശോധനയാണ് നടത്തിയത്. വിദേശമദ്യഷാപ്പുകളിലായി 128 പരിശോധനയും ബീയര് പാര്ലറുകളിലായി 234 പരിശോധനയും നടത്തി. വിവിധ കേന്ദ്രങ്ങളില് നിന്നായി 899 കള്ളുസാമ്പിളും 21 ബീയര് സാമ്പിളും ശേഖരിച്ച് രാസപരിശോധനയ്ക്ക് അയച്ചു. പൊലീസ് ഉള്പ്പടെയുള്ള വകുപ്പുകളുമായി ചേര്ന്ന് 56 സംയുക്ത പരിശോധനയും നടത്തിയായി അദ്ദേഹം പറഞ്ഞു.
പൊതുജനങ്ങളില് നിന്നുള്ള പരാതിയുടെയും വിവരത്തിന്റേയും അടിസ്ഥാനത്തില് നടത്തിയ പരിശോധനയില് വിവിധ റേഞ്ചുകളിലായി 80 കേസുകളാണ് എടുത്തത്. പൊതുസ്ഥലത്ത് മദ്യപിച്ചതിന് 575 കേസുകളാണ് ഇക്കാലയളവില് രജിസ്റ്റര് ചെയ്തത്.
കായല് ടൂറിസവുമായി ബന്ധപ്പെട്ട മൂന്ന് എന്.ഡി.പി.എസ്. കേസും 739 കോപ്ട കേസും രജിസ്റ്റര് ചെയ്തു. ഇവയില് നിന്നായി 1.47 ലക്ഷം രൂപയാണ് പിഴയീടാക്കിയത്. ലൈസന്സ് വ്യവസ്ഥകള്ക്കു വിപരീതമായി പ്രവര്ത്തിച്ചതിന് കള്ളുഷാപ്പുകള്ക്കെതിരേ വിവിധ റേഞ്ചുകളിലായി 15 കേസ് എടുത്തിട്ടുണ്ട്.
മെഡിക്കല് സ്റ്റോറിലും പരിശോധന വേണമെന്ന ആവശ്യത്തെ തുടര്ന്ന് അതും നടപ്പാക്കുന്നുണ്ട്. ജില്ലയില് സ്കൂളുകള് ഉള്പ്പടെയുള്ള സ്ഥാപനങ്ങളിലായി 77 ബോധവല്ക്കരണ ക്ലാസുകളാണ് നടത്തിയത്. പഞ്ചായത്ത് തലത്തില് 109 യോഗങ്ങള് ചേര്ന്നതായും അദ്ദേഹം പറഞ്ഞു.
