കോഴിക്കോട്: കുറ്റിയാടിയിലെ സ്വകാര്യ ആശുപത്രി ജീവനക്കാരി ആതിരയുടെ ദുരൂഹ മരണവുമായി ബന്ധപ്പെട്ട് പ്രത്യേക അന്വേഷണ സംഘത്തെ രൂപികരിക്കണമെന്ന് യുവമോര്ച്ച സംസ്ഥാന പ്രസിഡന്റ് കെ.പി. പ്രകാശ് ബാബു ആവശ്യപ്പെട്ടു.
സുരക്ഷാ സംവിധാനമുള്ള ആശുപത്രിയില് നിന്നും അര്ദ്ധരാത്രി രണ്ട് പെണ്കുട്ടികള് പുറത്തേക്ക് പോയതില് പങ്കുള്ള ചില ആശുപത്രി അധികൃതരെയും പെണ്കുട്ടികള്ക്ക് വാഹനമെത്തിച്ചു കൊടുത്ത കുറ്റിയാടി സ്വദേശിയെയും രക്ഷിക്കാനുള്ള ആസൂത്രിത ശ്രമമാണ് ഇപ്പോള് നടക്കുന്നതെന്നും അദ്ദേഹം പറഞ്ഞു.
പുലര്ച്ചെ സംശയാസ്പദമായ രീതിയില് റോഡില് കണ്ട പെണ്കുട്ടികളെ ചോദ്യം ചെയ്ത പോലീസിന്റെ തലയില് കുറ്റം ചുമത്തി പെണ്കുട്ടികളെ വാഹനം കൊടുത്ത് പുറത്തേക്കെത്തിച്ച സംഘങ്ങളെയും ആയതിന് കൂട്ടുനിന്ന അശുപത്രി അധികൃതരെയും വെള്ളപൂശാനുള്ള ഡിസിസി നേത്യത്വത്തിന്റെ ശ്രമം വിലപ്പോവില്ലെന്നും അദ്ദേഹം പറഞ്ഞു.
സമാനമായ ആത്മഹത്യ ഇതേ സ്ഥാപനവുമായി ബന്ധപ്പെട് മുമ്പും ഉണ്ടായിട്ടുണ്ടെന്നും പെണ്കുട്ടികള് പുറത്ത് പോയതിന്റെ പിന്നിലുള്ള പ്രലോഭനങ്ങളെക്കുറിച്ചും സംഘങ്ങളെക്കുറിച്ചും ഗൗരവകരമായ അന്വേഷണം ആവശ്യപ്പെട്ട് മുഖ്യമന്ത്രിക്ക് പരാതി അയച്ചിട്ടുണ്ടെന്നും അദ്ദേഹം പറഞ്ഞു.
