തുറവൂര്: എഴുപുന്ന കരപ്പാടത്ത് പറന്നിറങ്ങിയ വിരുന്നുകാരന് നാട്ടുകാര്ക്ക് കൗതുകമായി. വളരെ അപൂര്വമായി മാത്രം കേരളത്തിലെത്തുന്ന ചേരകൊക്കന് എന്നറിയപ്പെടുന്ന ഏഷ്യന് ഓപ്പണ് ബില്സ് എന്ന പക്ഷിയാണ് എഴുപുന്ന കാരുണ്യപുരം സെന്റ് സെബാസ്റ്റ്യറ്റിയന്സ് പള്ളിയുടെ മുന്വശത്തുള്ള കരപ്പാടത്ത് എത്തിയത്.
കാഴ്ചയ്ക്ക് വിസ്മയം ഒരുക്കുന്ന ഈ പക്ഷി കരപ്പാടങ്ങളിലെ ഞവിണിക്ക, തവള എന്നിവയെ അകത്താക്കാനാണ് എത്തുന്നത്. ഞവിണിക്കയോടാണ് ഏറെ പ്രിയം. വെള്ളം വറ്റിക്കിടക്കുന്ന കരപ്പാടങ്ങളില് ഞവിണിക്ക ഏറെയുണ്ട്.
കഴുത്തിന്റെയും കാലിന്റെയും അസാധാരണ നീളമാണ് ഈ പക്ഷിയെ വ്യത്യസ്ഥമാക്കുന്നത്. വിശാലമായ ചിറകുകളാണിതിന്. പറന്നിറങ്ങുന്നതും പറന്നുയരുന്നതും ഏറെ കൗതുകമുണ്ടാക്കുന്ന കാഴ്ചയാണ്. അധികം അകലെയല്ലാതെ ചങ്ങരം, നീണ്ടകര എന്നിവിടങ്ങളില് പക്ഷിസങ്കേതങ്ങള് ഉണ്ടെങ്കിലും കരിനിലങ്ങളായ ഈ സ്ഥലങ്ങളിലേക്ക് ഇവ പോകാറില്ലെന്നാണ് പക്ഷിനിരീക്ഷകര് പറയുന്നത്. കരപ്പാടങ്ങളാണ് ഈ പക്ഷികള്ക്ക് ഏറെ പ്രിയം. ചേരകൊക്കനെ കാണാന് ദിനംപ്രതി ആളുകള് വിവിധ സ്ഥലങ്ങളില് നിന്നും എത്തിച്ചേരുന്നുണ്ട്.
