ന്യൂദല്ഹി: ആദായനികുതി വകുപ്പിന്റെ പരിശോധനയില് ദല്ഹിയിലെ ഹോട്ടലില് നിന്നും 3.25 കോടി രൂപയുടെ അസാധു നോട്ടുകള് പിടികൂടി. ബംഗളുരുവിലെ പരിശോധനയില് 2.25 കോടി രൂപയുടെ പുതിയ നോട്ടുകളും പിടികൂടി.
ആദായനികുതി വകുപ്പും ദല്ഹി പോലീസും സംയുക്തമായി നടത്തിയ പരിശോധനയിലാണ് ദല്ഹി കരോള് ബാഹിലെ ഒരു ഹോട്ടലില് നിന്നും പഴയ കറന്സി നോട്ടുകള് പിടിച്ചെടുത്തത്. സംഭവവുമായി ബന്ധപ്പെട്ട് അഞ്ചു പേര് പിടിയിലായിട്ടുണ്ട്. ഇവര്ക്ക് ഹവാല ഇടപാടുമായി ബന്ധമുണ്ടെന്നാണ് പോലീസ് സംശയിക്കുന്നത്. ഇവരെ പോലീസ് ചോദ്യം ചെയ്തു വരികയാണ്. അതിവിദഗ്ദ്ധമായാണ് നോട്ടുകള് പായ്ക്ക് ചെയ്തിരുന്നത്. വിമാനത്താവളങ്ങളിലെ സ്കാനറുകളില് നോട്ടുകള് പതിയാതിരിക്കുന്നതിന് വേണ്ടി ടേപ്പുകളും വയറുകളും ഉപയോഗിച്ചായിരുന്നു പായ്ക്കിംഗ്. പിടിയിലായവരുടെ മൊബൈല് ഫോണ് വിവരങ്ങളും മറ്റും പോലീസ് പരിശോധിച്ചു വരികയാണ്.
രാജ്യവ്യാപകാമായി കള്ളപ്പണത്തിനെതിരെ ആദായനികുതി വകുപ്പും എന്ഫോഴ്സ്മെന്റും വിശ്രമമില്ലാതെ പരിശോധനകള് നടത്തി വരികയാണ്. ബംഗളുരുവില് നിന്നും ഇന്ന് 2.25 കോടി രൂപയുടെ കറന്സിയാണ് പിടികൂടിയത്. 2000 രൂപയുടെയും 500 രൂപയുടെയും കറന്സിയാണ് കണ്ടെടുത്തത്. ദല്ഹി, ബെംഗളൂരു, ചെന്നൈ തുടങ്ങിയ നഗങ്ങളില് നിന്ന് കോടിക്കണക്കിന് രൂപ കഴിഞ്ഞ ദിവസങ്ങളില് കണ്ടെടുത്തിരുന്നു.
പുതിയ നോട്ടുകള് രാജ്യത്തിന്റെ വിവിധ ബാങ്കുകളില് നിന്നും പുറത്തേയ്ക്ക് ഒഴുകിയിട്ടുണ്ടെന്നാണ് ലഭിക്കുന്ന വിവരം. അതിനാല് ബാങ്കുകള് കേന്ദ്രീകരിച്ചും വരും ദിവസങ്ങളില് അന്വേഷണം ഉണ്ടാകും.
