മുഹമ്മ: സര്ക്കാരിന്റെ സഹായത്തിന് കാത്തുനില്ക്കാതെ വൃക്കരോഗിയും അന്ധനുമായ കുട്ടപ്പന്(46)ദുരിതങ്ങളില്ലാത്ത ലോകത്തിലേയ്ക്ക് യാത്രയായി. കഞ്ഞിക്കുഴി പാപ്പാളിവെളി കോളനിയില് ദേവകിയുടെ മകന് കുട്ടപ്പന്(46)ആണ് മരിച്ചത്. കുട്ടപ്പനെക്കൂടാതെ മുകുന്ദന്(66), ഗോപിനാഥന്(43), ഗോപനാഥന്റെ മക്കളായ കീര്ത്തന(13), അമല്നാഥ്(9) എന്നിവരടങ്ങുന്ന ഈ അന്ധ കുടുംബത്തിന്റെ ദുരിതം മനസിലാക്കി കഴിഞ്ഞ സര്ക്കാരിന്റെ കാലത്ത് നിരവധി വാഗ്ദാനങ്ങള് നല്കിയെങ്കിലും ഒന്നും ഫലവത്തായില്ല. ജീന് തെറാപ്പിയിലൂടെ അഞ്ചുപേര്ക്കും വെളിച്ചമേകാനും പട്ടിക വര്ഗത്തില് ഉള്ളാട സമുദായത്തില്പെട്ട ഈ കുടുംബത്തിന് ആശിക്കും ഭൂമി വാങ്ങി 10 ലക്ഷം രൂപ മുടക്കി വീട് വെച്ച് കൊടുക്കുമെന്ന പ്രഖ്യാപനവും നടപ്പിലായില്ല. ബി എ പൊളിറ്റിക്സ് ടെലിഫോണ് ഓപ്പറേറ്റര്,കംപ്യൂട്ടര് സര്ട്ടിഫിക്കേറ്റുകള് നേടിയ കുട്ടപ്പന് ട്രൈബെല് ഡിപ്പാര്ട്ടുമെന്റില് ജോലിയും നല്കാമെന്ന ഉറപ്പ് നല്കിയിരുന്നു.
അന്ധരായ ഈ സഹോദരങ്ങള് ബോട്ടിലും ബസിലും പാട്ടുപാടിയാണ് അര്ബുദ രോഗിയായ മാതാവിനെയും മറ്റു കുടുംബാംഗങ്ങളെയും പോറ്റിയിരുന്നത്. എന്നാല് മുകുന്ദനും കുട്ടപ്പനും വൃക്കരോഗികളായി മാറിയതിനെ തുടര്ന്ന് അതിനും കഴിഞ്ഞിരുന്നില്ല. മുകുന്ദന് കോട്ടയം മെഡിക്കല് കോളേജ് ആശുപത്രിയില് ചികിത്സയിലാണ്. ഇരുവരുടെയും ചികിത്സയ്ക്കായി കഞ്ഞിക്കുഴി പഞ്ചായത്ത് പ്രസിഡന്റിന്റെ നേതൃത്വത്തില് ചികിത്സാസഹായ നിധി രൂപീകരിച്ചിരുന്നു.
