തന്റെ കണ്ടുപിടുത്തവുമായി ബൈജു
ചേര്ത്തല: ദേശീയ ഊര്ജ സംരക്ഷണ ദിനത്തില് കണ്ടുപിടുത്തങ്ങളുടെ ലോകത്തിലേക്ക് പുതിയ ചുവടുവയ്പുമായി ബൈജു. ഇത്തവണ ഫ്രിഡ്ജ് ഉപയോഗിക്കാതെ പാനീയങ്ങള് തണുപ്പിക്കുന്നതിനുള്ള ‘കൂള്-ബി’ എന്ന ഉപകരണം വികസിപ്പിച്ചെടുത്താണ് കെഎസ്ഇബി ഉദ്യോഗസ്ഥനായ കെ.സി. ബൈജു ശ്രദ്ധേയനാകുന്നത്. കഴിഞ്ഞ വര്ഷത്തെ സംസ്ഥാന ഊര്ജസംരക്ഷണ അവാര്ഡ് ജേതാവായ ബൈജു ഇതിനകം നിരവധി കണ്ടുപിടുത്തങ്ങള് നടത്തിയിട്ടുണ്ട്. ഫ്രിഡ്ജിനുള്ളില് തണുപ്പിക്കുന്ന പാനീയം പുറത്തെടുത്താല് അതിവേഗം തണുപ്പകലും. എന്നാല് കൂള്-ബിയിലൂടെ ഏറെനേരം തണുപ്പ് നിലനിര്ത്താമെന്നതാണ് സവിശേഷത. ലോഹനിര്മിതമായ ഫ്ളാസ്കിന് ചെലവ് നന്നേ കുറവാണ്. സ്റ്റെയിന്ലെസ് സ്റ്റീല് നിര്മിത കുപ്പിക്കുള്ളില് ഘടിപ്പിച്ച മറ്റൊരു കുപ്പിയാണ് പ്രധാനഭാഗം. രണ്ടിന്റെയും ഇടയിലുള്ള ഭാഗത്ത് വെള്ളമോ ബ്രെയിന് ലായനിയോ ആണ് നിറയ്ക്കുക. ശേഷം ഫ്രിഡ്ജില് വയ്ക്കുമ്പോള് ദ്രവരൂപം തണുപ്പ് ആഗീകരണം ചെയ്യും. ആവശ്യമുള്ളപ്പോള് പുറത്തെടുത്ത് കാലിയായ രണ്ട് കുപ്പികളിലുമുള്ള കുഴലില് പാനീയം നിറച്ചാല് അതിലേക്ക് പെട്ടെന്ന് തണുപ്പ് വ്യാപിക്കും.
പാനീയം വിളമ്പേണ്ട നേരത്ത് കൂള്-ബിയിലൂടെ കടത്തിവിട്ട് പാത്രത്തില് തണുപ്പോടെ ശേഖരിക്കുന്നതിനുള്ള സംവിധാനവും ഉണ്ട്. ഇങ്ങനെ പാനിയത്തിന്റെ തണുപ്പ് ക്രമീകരിച്ച് ഉപയോഗിക്കാം. തണുപ്പ് വിടാതിരിക്കാന് ഇന്സുലേറ്റഡ് കവചം ഇതിനുണ്ട്. വൈദ്യുതി ഉപയോഗം കുറയ്ക്കുന്നതിന് വൈകുന്നേരങ്ങളില് ഫ്രിഡ്ജ് ഓഫ് ചെയ്താലും അതിനുള്ളിലെ കൂള്-ബിയില് തണുപ്പ് അകലില്ല. പ്ലാസ്റ്റിക് കുപ്പിയില് വെള്ളംനിറച്ച് തണുപ്പിക്കാന് ഫ്രിഡ്ജില് വയ്ക്കുമ്പോള് വൈദ്യുതി ഉപയോഗം അധികമാണ്. ശീതളപാനീയങ്ങള്ക്ക് ഫ്രിഡ്ജ് ഉപയോഗിക്കുന്നവര് കൂള്-ബി പ്രയോജനപ്പെടുത്തിയാല് മാസം എട്ട് യൂണിറ്റ് വരെ വൈദ്യുതി ലാഭിക്കാമെന്ന് ബൈജു പറഞ്ഞു. ഇടത്തരം വലിപ്പത്തിലെ കൂള്-ബി ഏതാനുംമാസം മുമ്പ് സ്വയംനിര്മ്മിച്ച് ഫലപ്രദമായി വീട്ടില് ഉപയോഗിക്കുന്നുവെന്നും അദ്ദേഹം പറഞ്ഞു. 600 രൂപയാണ് നിര്മ്മാണച്ചെലവ്. വാണിജ്യാടിസ്ഥാനത്തില് നിര്മ്മിച്ചാല് ചെലവ് ഗണ്യമായി കുറയ്ക്കാം.
തിരുവന്തപുരം വൈദ്യുതിഭവനില് റിന്യൂവബിള് എനര്ജി ചീഫ് എന്ജിനിയറുടെ കീഴിലുള്ള ഗവേഷണ വിഭാഗത്തില് ജോലിനോക്കുന്ന ബൈജു ഇതിനകം 35ല്പരം കണ്ടുപിടിത്തങ്ങള് നടത്തി. പട്ടണക്കാട് വിസ്മയം വീട്ടില് ബൈജുവിന്റെ കണ്ടുപിടുത്തങ്ങള്ക്ക് പ്രോല്സാഹനവുമായി ഭാര്യ അശ്വതിയും, മകന് അക്ഷയും കുടെയുണ്ട്.
