ന്യൂദല്ഹി: കേരളത്തിനെതിരായ രഞ്ജി ട്രോഫി ക്രിക്കറ്റ് ഗ്രൂപ്പ് സി മത്സരത്തില് സര്വീസസിന് മികച്ച സ്കോര്. ഓപ്പണറും നായകനുമായ അന്ഷുല് ഗുപ്തയുടെ (105) സെഞ്ചുറിയാണ് അവര്ക്ക് തുണയായത്. ആദ്യ ഇന്നിങ്സില് 322 റണ്സെടുത്ത സര്വീസസിനെതിരെ രണ്ടാം ദിവസം കളി നിര്ത്തുമ്പോള് ഒരു വിക്കറ്റ് നഷ്ടത്തില് 32 റണ്സില് കേരളം.
നാല് വിക്കറ്റിന് 103 എന്ന നിലയില് രണ്ടാം ദിവസം തുടങ്ങിയ സര്വീസസിന് അന്ഷുലും രാഹുല് സിങ്ങുമാണ് (71) മികച്ച സ്കോര് സമ്മാനിച്ചത്. ആറാം വിക്കറ്റില് ഇവര് 119 റണ്സ് ചേര്ത്തു. 222 പന്തില് 13 ഫോറുകളോടെ അനുഷല് ഫസ്റ്റ് ക്ലാസ് കരിയറിലെ മൂന്നാം സെഞ്ചുറി തികച്ചത്. വികാസ് യാദവ് (32), വികാസ് ഹത്വാല (30), ഷംഷേര് യാദവ് (24) എന്നിവരും പിന്തുണ നല്കി. കേരള ബൗളര്മാര് നല്കിയ 24 എക്സ്ട്രാ റണ്ണുകളും സര്വീസസിന് മുതല്ക്കൂട്ട്. കേരളത്തിനായി അരങ്ങേറ്റക്കാരന് അതിഫ് ബിന് അഷറഫ് നാലു വിക്കറ്റെടുത്തു. സന്ദീപ് വാര്യര്, അക്ഷയ് ചന്ദ്രന് എന്നിവര്ക്ക് രണ്ട് വീതം വിക്കറ്റ്. ബേസില് തമ്പി, ഇഖ്ബാല് അബ്ദുള്ള എന്നിവര് ഓരോന്നും വിക്കറ്റെടുത്തു.
മറുപടി തുടങ്ങിയ കേരളത്തിന് ഫോമിലുള്ള ഓപ്പണര് മുഹമ്മദ് അസറുദ്ദീനെ (10) നഷ്ടം. വിക്കറ്റ് ഇര്ഫാന് ഖാന്. ഓപ്പണര് ഭവിന് താക്കര് (12), നായകന് രോഹന് പ്രേം (അഞ്ച്) എന്നിവര് ക്രീസില്.
