ആലപ്പുഴ: ഹരിതകേരളം പദ്ധതിയുടെ ഭാഗമായി വീണ്ടും ഉപയോഗിക്കാന് കഴിയുന്ന ഉപകരണങ്ങളുടെയും വസ്തുക്കളുടെയും കൈമാറ്റ കച്ചവടം പ്രോത്സാഹിപ്പിക്കുന്ന സ്വാപ് ഷോപ്പുകള് ജനങ്ങള്ക്ക് പുതുമയേകി. പൊതുജനങ്ങളില് നിന്നും പുനരുപയോഗയോഗ്യമായ വസ്തുക്കള് ശേഖരിച്ച് ആവശ്യകാര്ക്ക് സൗജന്യ നിരക്കിലും സൗജന്യമായും നല്കി.
ഒരു വീട്ടില് ആവശ്യമില്ലാത്ത വസ്തുക്കള് മറ്റൊരു വീട്ടില് ആവശ്യമായി വരാം. തുണിത്തരങ്ങള്, ഫര്ണിച്ചര്, മെത്ത, ടി.വി., ഫ്രിഡ്ജ്, കമ്പ്യൂട്ടര്, മിക്സി, ഇസ്തിരിപ്പെട്ടി, വാഷിങ് മെഷിന്, മ്യൂസിക് സിസ്റ്റം, കളിപ്പാട്ടങ്ങള്, സ്കൂള് സാമഗ്രികള് തുടങ്ങി വീണ്ടും ഉപയോഗിക്കാന് കഴിയുന്ന എന്തും സ്വാപ് ഷോപ്പിലൂടെ വിതരണം ചെയ്യാനായാണ് ഷോപ്പ് തുറന്നത്. കൂടുതലായും വസ്ത്രങ്ങളും ബാഗുകളും കുട്ടികളുടെ കളിപ്പാട്ടങ്ങളുമൊക്കെയാണ് ഷോപ്പുകളിലെത്തിയത്. ഹരിപ്പാട് ഒഴികെ എല്ലാ നഗരസഭകളിലും സ്വാപ് ഷോപ്പുകള് തുറന്നു. രാവിലെ 10 മുതല് വൈകിട്ട് മൂന്നുവരെ വിവിധ കേന്ദ്രങ്ങളില് കൈമാറ്റ കച്ചവടം നടന്നു.
ചെങ്ങന്നൂരില് മുന്സിപ്പല് കോംപ്ലക്സ്, ചേര്ത്തലയില് ടൗണ്ഹാള്, മാവേലിക്കരയില് ഗവണ്മെന്റ് ടി.ടി.ഐ. അങ്കണം, കായംകുളത്ത് ഇന്ഡസ്ട്രിയല് എസ്റ്റേറ്റ് എന്നിവിടങ്ങളിലാണ് സ്വാപ് ഷോപ്പുകള് പ്രവര്ത്തിച്ചത്. മുതുകുളം ബ്ലോക്ക് പഞ്ചായത്തിന്റെ സ്വാപ്പ് ഷോപ്പ് മേള വൈകിട്ട് നാലു വരെ കായംകുളം പാര്ക്ക് മൈതാനിയില് നടന്നു. കായംകുളം നഗരസഭാധ്യക്ഷന് അഡ്വ. എന്. ശിവദാസന് ഉദ്ഘാടനം ചെയ്തു. തുണികളടക്കം 5012 വസ്തുക്കള് സൗജന്യമായി വിതരണം ചെയ്തു. മുതുകുളം ബ്ലോക്ക് പഞ്ചായത്ത് പ്രസിഡന്റ് അഡ്വ. ബിപിന് സി. ബാബു ആധ്യക്ഷ്യം വഹിച്ചു. ബി.ഡി.ഒ. ആര്. രാജീവ് നേതൃത്വം നല്കി. പറഞ്ഞു. ആലപ്പുഴ ടൗണ്ഹാളില് നടന്ന സ്വാപ്പ് മേള നഗരസഭാധ്യക്ഷന് തോമസ് ജോസഫ് ഉദ്ഘാടനം ചെയ്തു. നഗരസഭാംഗം ഷോളി സിദ്ധകുമാര് പങ്കെടുത്തു.
