തേഞ്ഞിപ്പലം: മൂന്നാം ദിനം ട്രാക്കില് തീപാറിയ പോരാട്ടത്തിനാണ് സ്പ്രിന്റ് റിലേ സാക്ഷ്യം വഹിച്ചത്. ആറ് വിഭാഗങ്ങളിലായി നടന്ന ഫൈനലുകളില് രണ്ട് റെക്കോഡുകള് പിറന്നു. കാല് നൂറ്റാണ്ടിലേറെ പഴക്കമുള്ള റെക്കോഡ് തകര്ത്ത് കോഴിക്കോടിന്റെ ജൂനിയര്’പെണ്കുട്ടികളും, സീനിയര് ആണ്കുട്ടികളുടെ വിഭാഗത്തില് എറണാകുളവുമാണ് റെക്കോഡ് ബുക്കില് പേരെഴുതിച്ചേര്ത്തത്.
ജൂനിയര് പെണ്കുട്ടികളില് കോഴിക്കോട് ഒന്നാമത്. ഉഷ സ്കൂളിന്റെ ടി. സൂര്യമോള്, ബിസ്മി ജോസഫ്, ആദിത്യ, പൂല്ലൂരാംപാറ സെന്റ് ജോസഫ്സ് എച്ച്എസിലെ അപര്ണ റോയ് എന്നിവരടങ്ങിയ ടീം 49.23 സെക്കന്ഡില് റെക്കോഡോടെ പൊന്നണിഞ്ഞു. ഇവരുടെ കുതിപ്പില് പഴങ്കഥയായത് 1988-ല് കണ്ണൂര് സ്ഥാപിച്ച 49.30 സെക്കന്ഡ്. 50.80 സെക്കന്ഡില് കോട്ടയത്തിന് വെള്ളി, 51.07 സെക്കന്ഡില് ഇടുക്കിക്ക് വെങ്കലം.
സീനിയര് ആണ്കുട്ടികളില് എബിന് ജോസ്, ഷെറിന് മാത്യു, അഖില്, നിബിന് ബൈജു എന്നിവര് 42.50 സെക്കന്ഡില് പുതിയ റെക്കോഡുമായി സ്വര്ണം നേടി. 2010-ല് കോട്ടയം സ്ഥാപിച്ച 42.63 സെക്കന്ഡ് പഴങ്കഥ. പാലക്കാട് വെള്ളിയും തൃശൂര് വെങ്കലവും നേടി.
സീനിയര് പെണ്കുട്ടികളുടെ റിലേയില് പാലക്കാടിന് സ്വര്ണം. വിന്സി. കെ, അഞ്ജന. എം, വിനി, അഞ്ജലി ജോണ്സണ് എന്നിവര് അടങ്ങിയ ടീം 49.33 സെക്കന്ഡില് ഫിനിഷ് ലൈന് കടന്നു. 51.10 സെക്കന്ഡില് കണ്ണൂര് വെള്ളിയും 51.22 സെക്കന്ഡില് കൊല്ലം വെങ്കലവും നേടി.
ജൂനിയര് ആണ്കുട്ടികളില് പാലക്കാടിനാണ് സ്വര്ണം. നിജില് കൃഷ്ണന്, കെ. മുഹമ്മദ് സനൂപ്, സുമിന് സുരേഷ്, അഖില് പി.എസ് എന്നിവരടങ്ങിയ ടീം 44.41 സെക്കന്ഡില് സ്വര്ണത്തിലേക്ക് കുതിച്ചു. 45.03 സെക്കന്ഡില് കോട്ടയം വെള്ളിയും 45.65 സെക്കന്ഡില് തൃശൂര് വെങ്കലവും നേടി.
സബ് ജൂനിയര് പെണ്കുട്ടികളില് 54.77 സെക്കന്ഡില് ഇടുക്കിക്ക് സ്വര്ണം. നന്ദന സുരേഷ്, അഭി്രശീ സാബു, ദിവ്യഭാരതി, രശ്മി ജയരാജ് എന്നിവരാണ് ട്രാക്കിലെത്തിയത്. 54.92 സെക്കന്ഡില് എറണാകുളം വെള്ളിയും 54.98 സെക്കന്ഡില് തിരുവനന്തപുരം വെങ്കലവും നേടി.
ഇതേ വിഭാഗം ആണ്കുട്ടികളില് 48.38 സെക്കന്ഡില് ഫിനിഷ് ചെയ്ത കൊല്ലത്തിന് സ്വര്ണം. ബിന്ഷാദ്. എസ്, ആബിദ് സഫര്, റോബിന് ജോണ്സണ്, നീരജ്. ബി.എ എന്നിവരാണ് പാലക്കാടിന്റെയും എറണാകുളത്തിന്റെയും വെല്ലുവിളി മറികടന്ന് പൊന്നണിഞ്ഞത്. 48.83 സെക്കന്ഡില് പാലക്കാട് വെള്ളിയും 49.14 സെക്കന്ഡില് എറണാകുളം വെങ്കലവും നേടി.
