കട്ടപ്പന: കാഞ്ചിയാര് പള്ളിക്കവലയില് സംഘടിപ്പിച്ച വടംവലി മത്സരത്തിനിടെ കാണികളും പോലീസും തമ്മില് സംഘര്ഷം. സംഘര്ഷത്തില് എസ്ഐക്ക് പരുക്കേറ്റു.
കാഞ്ചിയാര് കേന്ദ്രീകരിച്ച് പ്രവര്ത്തിക്കുന്ന ക്ലബ്ബ് സംഘടിപ്പിച്ച വടംവലി മത്സരത്തിനിടെയാണ് സംഘര്ഷമുണ്ടായത്. കട്ടപ്പന-കുട്ടിക്കാനം സംസ്ഥാനപാതയുടെ സമീപത്ത് നടത്തിയ വടംവലി മത്സരം കാണാന് നിരവധി ആളുകളാണ് തടിച്ചുകുടിയത്. കാണികള്ക്കായി റോഡിന് ഇരുവശവുംബാരിക്കേടുകളും തീര്ത്തിരുന്നു.
എന്നാല് ആവേശം അതിരുവിട്ടതോടെ കാണികള് റോഡിലേക്കിറങ്ങി. ഇതോടെ കട്ടപ്പന-കുട്ടിക്കാനം സംസ്ഥാനപാതയില് ഗതാഗതം സ്തംഭിച്ചു. വിവരമറിഞ്ഞ് സ്ഥലത്തെത്തിയ കട്ടപ്പന പോലീസ് കാണികളെ നിയന്ത്രിക്കാനായി രംഗത്തിറങ്ങിയെങ്കിലും രംഗം കൂടുതല് വഷളാകുകയായിരുന്നു.
കാണികള്ക്കിടയിലുണ്ടായ ചെറിയ സംഘര്ഷത്തെ തുടര്ന്ന് പോലീസ് ലാത്തി വീശി. ഇതോടെ നിരപരാധികളെ മര്ദ്ദിച്ചുവെന്നാരോപിച്ച് നാട്ടുകാര് പോലീസിന് നേരെ തിരിഞ്ഞതോടെ സംഘര്ഷം വഷളായി. സംഘര്ഷത്തില് കട്ടപ്പന എസ്.ഐ റ്റി സി മുരുകനടക്കമുള്ള പോലീസുകാര്ക്കും നാട്ടുകാര്ക്കും പരിക്കുപറ്റി. ഇതോടെ സംഘാടകര് മത്സരം ഉപേക്ഷിക്കുകയായിരുന്നു. സംഭവത്തില് കേസെടുത്തതായി കട്ടപ്പന പോലീസ് അറിയിച്ചു. രണ്ട് കേസുകളാണ് രജിസ്റ്റര് ചെയ്തിരിക്കുന്നത്.
പ്രതികരിക്കാൻ ഇവിടെ എഴുതുക: