കണ്ണൂര്: നഗരത്തില് കെഎംസി നമ്പറില്ലാത്ത ഓട്ടോറിക്ഷകള് സര്വീസ് നടത്തുന്നതിനെ ചൊല്ലി തൊഴിലാളികള് തമ്മിലുള്ള തര്ക്കം രൂക്ഷമാകുന്നു. ഇന്നലെ നഗരത്തില് കെ.എം.സി നമ്പറില്ലാത്ത ഓട്ടോറിക്ഷകളെ തടയാന് ഒരു സംഘം ഓട്ടോത്തൊഴിലാളികള് ശ്രമിച്ചത് ഇരുവിഭാഗവും തമ്മില് കലഹത്തിനിടയാക്കി. ഇന്നലെ രാവിലെ 11 ഓടെ കണ്ണൂര് താലൂക്ക് ഓഫീസിന് മുന്നിലായിരുന്നു സംഭവം. കെഎംസി നമ്പറില്ലാത്ത ഓട്ടോറിക്ഷകളെ തടയുന്നത് ചോദ്യം ചെയ്യാനായി മറു വിഭാഗവും സ്ഥലത്ത് തമ്പടിച്ചതോടെ സംഘര്ഷ സാധ്യതയുള്ളതിനാല് സ്ഥലത്ത് പോലീസും നിലയുറപ്പിച്ചു. കെഎംസി നമ്പറില്ലാത്ത ഓട്ടോകളെ തടയാന് പോലീസ് വിമുഖത കാണിക്കുന്നുവെന്ന് ആരോപിച്ച് ഒരു വിഭാഗം തൊഴിലാളികള് പോലീസ് ഉദ്യോഗസ്ഥരുമായി കയര്ത്തു.
കെഎംസി നമ്പര് വിഷയത്തില് മേയറുടെ നേതൃത്വത്തില് ഇരുവിഭാഗത്തെ പ്രതിനിധികളെയും ഉള്പ്പെടുത്തി കഴിഞ്ഞദിവസം യോഗം ചേര്ന്നുവെങ്കിലും തീരുമാനമാകാതെ പിരിയുകയായിരുന്നു. അതേസമയം, കെഎംസി നമ്പറില്ലാത്ത ഓട്ടോറിക്ഷകള്ക്കും സര്വീസ് നടത്താന് മേയര് അനുവദിച്ചെന്ന് ഒരു സംഘം അവകാശപ്പെട്ട് രംഗത്തെത്തിയിരുന്നു. എന്നാല് അങ്ങനെയൊരു തീരുമാനം യോഗത്തില് ഇല്ലായിരുന്നവെന്ന് ഒരു വിഭാഗം ഓട്ടോറിക്ഷ തൊഴിലാളികള് പറയുന്നു. കെഎംസി നമ്പറില്ലാത്ത ഓട്ടോകളെ തടയുമെന്ന് മറ്റ് ഓട്ടോത്തൊഴിലാളികള് കഴിഞ്ഞദിവസം വ്യക്തമാക്കിയിരുന്നു. ഇതിന്റെ തുടര്ച്ചയായാണ് ഇന്നലെ നഗരത്തില് കെഎംസി നമ്പറില്ലാത്ത ഓട്ടോറിക്ഷകള് തടയാന് ഓട്ടോത്തൊഴിലാളികള് ശ്രമിച്ചത്. നഗരത്തില് കെഎംസി നമ്പറില്ലാത്ത ഓട്ടോറിക്ഷകള് സര്വീസ് നടത്തരുതെന്ന് സിഐയുടെ നിര്ദേശം നേരത്തെ തന്നെയുണ്ടെന്ന് നമ്പറുള്ള ഓട്ടോഡ്രൈവര്മാര് പറയുന്നു. കെഎംസി നമ്പറില്ലാത്ത ഓട്ടോഡ്രൈവര്മാര്ക്കൊപ്പമാണ് ഡെപ്യൂട്ടി മേയര് എന്നാണ് ഇവരുടെ ആരോപണം. ഡെപ്യൂട്ടി മോയറുടെ അടുത്ത അനുയായി കെഎംസി നമ്പറില്ലാത്ത ഓട്ടോറിക്ഷ ഓടിക്കുന്നയാളാണെന്നും ഇവര് പറയുന്നു.
കെഎംസി നമ്പര് പഴയ നഗരസഭ ഉണ്ടായിരുന്ന സമയത്ത് ഏര്പ്പെടുത്തിയതാണെന്നും കോര്പറേഷനായതോടെ ഇത് അപ്രസ്കതമായെന്നുമാണ് മറുഭാഗം വാദിക്കുന്നത്. കോര്പറേഷനിലേക്ക് ചില പഞ്ചായത്തുകള് കൂട്ടിച്ചേര്ക്കപ്പെട്ട സാഹചര്യത്തില് കെ.എം.സി നമ്പര് വീണ്ടും അനുവദിക്കണമെന്നും ഇവര് ആവശ്യപ്പെടുന്നു. നഗരത്തില് ഏകദേശം 2500 ഓട്ടോകള്ക്കാണ് കെ.എം.സി നമ്പറുള്ളത്.
