കൊച്ചി: ബ്ലാസ്റ്റേഴ്സിന്റെ അവസാന ഹോം മത്സരത്തില് നോര്ത്ത് ഈസ്റ്റിനെ പരാജയപ്പെടുത്തുമെന്ന് പ്രതിരോധനിരയിലെ കരുത്തന് സെഡ്രിക് ഹെങ്ബര്ട്ട്. ആത്മവിശ്വാസത്തോടെയാണ് കേരളം കളിക്കാനിറങ്ങുകയെന്നും അദ്ദേഹം പറഞ്ഞും. ടീം ആരാധകരുമായുള്ള മുഖാമുഖത്തിനിടെയാണ് ഫ്രഞ്ച്താരം ഇക്കാര്യം വ്യക്തമാക്കിയത്.
ഡിസംബര് നാലിലെ അവസാന മത്സരത്തിനായി കാത്തിരിക്കുകയാണെന്നാണ് മലയാളി താരം സി.കെ. വിനീതിന്റെ അഭിപ്രായം. നോര്ത്ത് ഈസ്റ്റിനെതിരായ മത്സരത്തില് ജയിച്ച് സെമിയോഗ്യത എന്നത് മാത്രമാണ് ഇപ്പോള് ലക്ഷ്യമെന്നും വിനീത് പറഞ്ഞു. ഇനിയെത്ര ഗോളുകള് നേടുമെന്ന ചോദ്യത്തിനായിരുന്നു വിനീതിന്റെ ഈ മറുപടി.
ഇഷ്ട ഭക്ഷണമേതെന്ന ഒരു ആരാധികയുടെ ചോദ്യത്തിന് കേരള പൊറോട്ടയും സദ്യയും എന്നായിരുന്നു പ്രതിരോധ താരം സന്ദേശ് ജിങ്കാന്റെ ആലോചനകളൊന്നുമില്ലാത്ത മറുപടി. ആദ്യ രണ്ടു മത്സരങ്ങളില് തോറ്റ ശേഷം ലീഗിലേക്ക് തിരിച്ചുവരാന് ടീമിന് ഊര്ജ്ജമായത് ആരാധകരുടെ പിന്തുണയാണെന്നും ജിങ്കാന് പറഞ്ഞു.
34-ാം വയസിലും കളംനിറഞ്ഞ് കളിക്കുന്ന മുഹമ്മദ് റാഫിയുടെ ഫിറ്റ്നസ് രഹസ്യത്തെ കുറിച്ചായിരുന്നു ഒരു ആരാധകന് അറിയേണ്ടിയിരുന്നത്. കഠിന പരിശീലനവും ഭക്ഷണ നിയന്ത്രണവും മാത്രമാണെന്ന് റാഫിയുടെ രണ്ടുവാക്കുകളിലൊതുങ്ങിയ മറുപടി.
ഇതിലൊതുങ്ങിയില്ല റാഫിയുടെ വാക്കുകള്. ഫുട്ബോളിലേക്ക് എത്താനുണ്ടായ പ്രചോദനം ചേട്ടനാണെന്നും മലയാളി സ്ട്രൈക്കര് റാഫി പറഞ്ഞു. ഫാന്സ് തന്നെയാണ് ടീമിന്റെ ശക്തി, നോര്ത്ത് ഈസ്റ്റിനെതിരായ മത്സരത്തില് മുഴുവന് ആരാധകരുടെ പിന്തുണ ഉണ്ടാവണമെന്നും റാഫി അഭ്യര്ത്ഥിച്ചു. സ്ട്രൈക്കര് അന്റോണിയോ ജെര്മന്റെ വാക്കുകളോടെയാണ് മുഖാമുഖം അവസാനിച്ചത്. എല്ലായ്പോഴും സ്വപ്നങ്ങള് കാണണമെന്നും അസാധ്യമായത് ഒന്നുമില്ലെന്നുമുള്ള അന്റോണിയോ ജെര്മന്റെ വാക്കുകള് ഹര്ഷാരാവത്തോടെയാണ് സദസ് സ്വീകരിച്ചത്. യുവതാരം തോങ്കോസിം ഹോകിപും മുഖാമുഖം പരിപാടിയില് പങ്കെടുത്തു.
