മറയൂര്: വീട്ടുകാര് പള്ളിയില് പോയ സമയത്ത് സമീപത്ത് നിന്നിരുന്ന മൂന്ന് ചന്ദനമരങ്ങള് മോഷ്ടാക്കള് മുറിച്ച് കടത്തി. കാന്തല്ലൂര് കരശിനാടാണ് സംഭവം. ഇവിടെ പെരിയവയല് മടത്തുമണ്ണില് രാജുവിന്റെ വീടിന് പിന്നില് നിന്നിരുന്ന ഒരു മരവും സമീപത്തായി വനത്തിനോട് ചേര്ന്ന് നിന്നിരുന്ന ഭൂമിയിലെ രണ്ട് മരവുമാണ് മുറിച്ച് കടത്തിയത്. ഞായറാഴ്ച്ച രാവിലെ 8.30 ഓടെയാണ് രാജുവും കുടുംബവും പള്ളിയില് പോയത്.
ഉച്ചയ്ക്ക് 1 മണിയോടെ പള്ളിയില് നിന്ന് തിരിച്ചെത്തിയപ്പോഴാണ് വീടിന് മുകളിലേക്ക് മരം വെട്ടിയിട്ടിരിക്കുന്നത് കണ്ടത്. സാമാന്യം വലിപ്പമുള്ള മരമാണ് മോഷണം പോയതെന്ന് രാജു പറഞ്ഞു. വീടിന്റെ മേല്ക്കൂരയ്ക്ക് സാരാമായ കേടുപാടുകള് സംഭവിച്ചിട്ടുണ്ട്. മറ്റ് രണ്ട് മരങ്ങള് മോഷണം പോയ പറമ്പില് വീട് പണി നടക്കുന്നതിനാലാണ് ഞായറാഴ്ച്ച ദിവസം പകല് മോഷണത്തിനായി തെരഞ്ഞെടുത്തത്. ഉദ്ദേശം 15 ലക്ഷം രൂപ വില വരുന്ന ചന്ദനമരങ്ങളാണ് മോഷണം പോയിരിക്കുന്നത്. അടുത്തിടെ അന്വേഷണം ശക്തമാക്കിയതിനെ തുടര്ന്ന് ചന്ദനമരങ്ങളുടെ മോഷണം ഗണ്യമായി കുറഞ്ഞിരുന്നു. മറയൂരില് സ്വകാര്യ വ്യക്തികളുടെ സ്ഥലങ്ങളില് നില്ക്കുന്ന മരങ്ങളാണ് മോഷ്ടാക്കള് ലക്ഷ്യം വച്ചിരിക്കുന്നത്.സംഭവത്തില്പോലീസില് പരാതി നല്കിയിട്ടില്ല.
