കാക്കനാട് : കുട്ടികളുടെ മാനസിക പിരിമുറുക്കം ഒഴിവാക്കാന് വിവിധ പരിപാടികളില് പങ്കാളികളാക്കണമെന്ന് ജസ്റ്റിസ്.ബി. കെമാല്പാഷ. സംസ്ഥാന ബാലാവകാശ സംരക്ഷണ കമ്മീഷന്റെ ആഭിമുഖ്യത്തില് നടന്ന സംവാദത്തില് സംസാരിക്കുകയായിരുന്നു അദ്ദേഹം.
കുട്ടികള് ഇന്ന് പലവിധ മാനസിക സംഘര്ഷത്തിലാണ്. ചുറ്റുപാടുകളില് നിന്നും കുടുംബങ്ങളില് നിന്നും ഇവര് പല തരത്തിലുള്ള വൈഷമ്യങ്ങള് നേരിടുന്നു. ഇതൊഴിവാക്കാന് മാതാപിതാക്കളും നല്ല സുഹൃത്തുക്കളുമായി സൗഹ്യദാന്തരീക്ഷമുണ്ടാക്കണം. സിനിമകള്, മറ്റു കലാപരിപാടികള് എന്നിവയില് ഇവരെ പങ്കെടുപ്പിക്കണം. സ്കൂളുകളില് അദ്ധ്യാപകര് കുട്ടികളുമായി സൗഹൃദത്തിലാവണം.
പലവിധത്തിലുള്ള പീഡനത്തിനിരയാകുന്ന തങ്ങള്ക്ക് നിയമസുരക്ഷ ലഭിക്കുമോയെന്ന് ഒരു പത്താം ക്ലാസ് വിദ്യാര്ത്ഥി ചോദിച്ചു. ഇന്ന് സമൂഹത്തില് കുട്ടികളുടെ നിയമ സുരക്ഷ കോടതി നിരീക്ഷിക്കുന്നുണ്ടെന്നും പരാതികളൊന്നും നല്കാതെ ടോള് ഫ്രീ നമ്പറില് വിളിച്ചാലും നിയമം നിങ്ങളുടെ സുരക്ഷക്കെത്തുമെന്നും ചൈല്ഡ് വെല്ഫെയര് അധികൃതര് പറഞ്ഞു. 18 വയസ്സിനു താഴെയുള്ള കുട്ടികളുടെ പേരോ, വിലാസമോ നല്കാതെ തന്നെ പ്രതികള്ക്കെതിരെ കര്ശന നടപടി സ്വീകരിക്കും. മാനസിക, ശാരീരിക പീഡനത്തിനിരയായാല് മാതാപിതാക്കള്, അദ്ധ്യാപകര്, ഏറ്റവും അടുത്ത സുഹൃത്തുക്കള് എന്നിവരെ അറിയിക്കണം.
ജില്ലയിലെ 17 സ്കൂളുകളിലെ വിദ്യാര്ത്ഥികളാണ് സംവാദത്തില് പങ്കെടുത്തത്. അഞ്ചു ഗ്രൂപ്പുകളായി തയ്യാറാക്കിയ ചോദ്യാവലി പൂരിപ്പിച്ച് നല്കി. വിദ്യാര്ത്ഥികള് തന്നെ നിര്മ്മിച്ചെടുത്ത കരകൗശലവസ്തുക്കളുടെ പ്രദര്ശനവും വില്പ്പനയും നടന്നു. വിദ്യാര്ത്ഥികള്ക്ക് യാത്രാ കണ്സെഷന് ടിക്കറ്റ് നല്കാത്തത് മാനസിക പീഡനമാണ്. സ്കൂളുകളില് സുരക്ഷിതമായ ടോയ്ലറ്റുകള് കുറവാണ്. ബസുകളില് പലവിധ ലൈംഗീക ചേഷ്ടകള്ക്കു വിധേയരാവുന്നുണ്ട്. സ്കൂളുകളില് അതീവ രഹസ്യമായി മയക്കുമരുന്നു വില്പ്പന നടക്കുന്നതിനാല് ആണ്കുട്ടികളും അപൂര്വ്വം പെണ്കുട്ടികളും ഇവ ഉപയോഗിക്കാറുണ്ടെന്ന് വിദ്യാര്ത്ഥികള് പറഞ്ഞു.
കളക്ടര് കെ.മുഹമ്മദ് .വൈ.സഫീറുള്ള , ചൈല്ഡ് വെല്ഫെയര് കമ്മറ്റി അംഗങ്ങളായി പത്മജ നായര്, നീനാ കുരുവിള തുടങ്ങിയവര് പങ്കെടുത്തു.
