ആലുവ: പെരിയാര് നീന്തിക്കടക്കുന്ന ഏറ്റവും പ്രായംകുറഞ്ഞയാള് എന്ന ബഹുമതിക്കായി തയ്യാറെടുക്കുകയാണ് അഞ്ചര വയസുകാരിയായ നിവേദിത. അപ്പോളോ ടയേഴ്സ് ജീവനക്കാരന് ഏലൂര് ഉദ്യോഗമണ്ഡല് മാടപ്പറമ്പില് ഇ.എസ്. സുജീന്ദ്രന്റെയും ജിഷയുടെയും മകളാണ് കൊച്ചുമിടുക്കി. മഞ്ഞുമ്മല് ഗാര്ഡിയന് ഏയ്ഞ്ചല്സ് പബ്ലിക് സ്കൂള് യുകെജി വിദ്യാര്ത്ഥിനിയാണ്. പെരിയാറിലെ നീന്തല് പരിശീലകനായ സജി വാളശേരിയാണ് നിവേദിതയുടെ ഗുരു.
29ന് രാവിലെ 9ന് അദൈ്വതാശ്രമം കടവില്നിന്ന് മണപ്പുറത്തേയ്ക്കാണ് നിവേദിത നീന്തുന്നത്. പെരിയാറിലെ അപകടമേറിയ ഭാഗമാണിത്. സെപ്തംബര് 28 മുതലാണ് ഇതിനായി പരിശീലനം തുടങ്ങി. ദിവസവും രാവിലെ 7.30 മുതല് ഒന്നര മണിക്കൂറാണ് പരിശീലനം. ഇതിനകം പത്തുതവണ പെരിയാര് മുറിച്ചുകടന്നിട്ടുണ്ട്.
അദൈ്വതാശ്രമത്തിലെ ജയന്തന് ശാന്തി നീന്തല് ഫഌഗ്ഓഫ് ചെയ്യും. ആലുവ നഗരസഭാ ചെയര്പേഴ്സണ് ലിസി എബ്രഹാം, അങ്കമാലി നഗരസഭാ ചെയര്പേഴ്സണ് ഗ്രേസി ജോയ് തുടങ്ങിയവര് ചരിത്രപ്രകടനത്തിന് സാക്ഷ്യം വഹിക്കും. മുങ്ങിമരണങ്ങള് നിത്യസംഭവമായപ്പോള് സജി വാളശേരി കുട്ടികളെ സൗജന്യമായി നീന്തല് പരിശീലിപ്പിക്കാന് മുന്നിട്ടിറങ്ങിയത്. ഏഴുവര്ഷത്തിനിടെ എണ്ണൂറോളം കുട്ടികളെ പരിശീലിപ്പിച്ചു. ഇതില് ഇരുനൂറ്റിയമ്പതോളം പേര് പെരിയാര് നീന്തിക്കടന്നു. ഭിന്നശേഷിക്കാരായ നവനീത്, കൃഷ്ണ എസ്. കമ്മത്ത് എന്നിവര് സജിയുടെ പരിശീലനത്തില് പെരിയാര് നീന്തിക്കടന്ന് ചരിത്രം കുറിച്ചവരാണ്.
