ഐക്യവും സ്‌നേഹവുമുള്ള കുടുംബത്തില്‍ ഒരു പിടി ചോറായാലും അവരത് പങ്കിട്ടു കഴിച്ച് സന്തോഷത്തോടെ കിടന്നുറങ്ങും. സ്വര്‍ഗം അവരുടെ വീട്ടിലാണ്. എന്നാല്‍ ഒരു കോടി സ്വത്തുണ്ട്, അഞ്ഞൂറു പവന്റെ സ്വര്‍ണമുണ്ട്. പക്ഷേ, ഐക്യമില്ലെങ്കില്‍ അവിടെ നരകത്തിന്റെയും കണ്ണുനീരിന്റെയും വെറുപ്പിന്റെയും തളമാണ് കാണുന്നത്. നമ്മുടെ ഐക്യമാണ് നമുക്ക് ആനന്ദം തരുന്നത്. അതുകൊണ്ട്, നിങ്ങളുടെ മനസ്സിന്റെ ഉല്‍പ്പത്തിയെ മനസ്സിലാക്കൂ! നിങ്ങളുടെ ജീവിതം എന്തിനുവേണ്ടിയാണെന്നറിയൂ.
നിങ്ങള്‍ക്ക് ശരിയായ ചൈതന്യ വലയം ഈശ്വരന്‍ തന്നിട്ടുണ്ട്. പരിധി നിര്‍ണയിക്കാന്‍ പറ്റാത്ത അനന്തശക്തിയുള്ളതാണത്. പക്ഷേ, ഇന്നത് ശുഷ്‌ക്കമാണ്. എന്നാല്‍, തപസ്സിലൂടെ അതില്‍ എത്ര കറന്റ് വേണമെങ്കിലും ചാര്‍ജ്ജ് ചെയ്യാന്‍ പറ്റും. ഏത് ലോകത്തിലും സഞ്ചരിക്കുവാന്‍ കഴിയും. മരണത്തെയും അതിജീവിക്കുവാന്‍ പറ്റും. നിങ്ങള്‍ മരിക്കുമെന്ന് ഭയക്കുകയേ വേണ്ട. ജനിക്കുമെന്നും ഓര്‍ക്കേണ്ട. നിങ്ങള്‍ ഒരിക്കലും മരിക്കുന്നുമില്ല, ജനിക്കുന്നുമില്ല. ഒരു ഫാനിനോ, ഫ്രിഡ്ജിനോ കേടുവന്നു എന്നുവച്ച് ആ കറന്റ് നശിക്കാത്തതുപോലെ, നിങ്ങളിലെ ആത്മാവ് എന്നും നിലനില്‍ക്കുന്നതാണ്.
‘ജോലിതാ ജോലിതാ’ എന്ന് സര്‍വരും പറയുന്നു. ജോലിയില്ലെന്ന് പറഞ്ഞ് ചെറുപ്പക്കാര്‍ ദുഃഖിക്കുന്നു. കള്ളിനും കഞ്ചാവിനും അടിമപ്പെടുന്നത് അതുമൂലമാണെന്ന് പറയുന്നു. ജോലി കിട്ടിയാല്‍ നിങ്ങള്‍ക്ക് സമാധാനം ഉണ്ടാകുമോ? അവനവന്റെ പേരിലുള്ള ഏക്കറുകണക്കിന് ഭൂമി ശൂന്യമായിക്കിടക്കാറുണ്ട്. അതിനകത്ത് കൃഷി ചെയ്താല്‍ ഇവന് കിട്ടാവുന്ന ശമ്പളത്തിന്റെ നൂറിരട്ടി ലാഭം ഉണ്ടാക്കുവാന്‍ സാധിക്കും. ചിലപ്പോള്‍ ഒരു പ്രാവശ്യം നഷ്ടം വന്നെന്നിരിക്കും. എന്നാലും പിന്മാറരുത്. അതിനാരും ശ്രമിക്കുന്നില്ല. ഇത്രയും ഭൂമി ഇട്ടിട്ടാണ് വെറുതെ അലഞ്ഞു നശിക്കുന്നത്. സമയം ഇല്ല എന്നാരും പറയേണ്ട, ധാരാളം സമയമുണ്ട്. അതുകൊണ്ട് നിങ്ങള്‍ മടിച്ചിരിക്കാതെ ശ്രമിക്കൂ!
