കട്ടപ്പന: ദുര്‍ഘട പാതയിലൂടെ യാത്രചെയ്യുന്ന ഭക്തര്‍ക്ക് തുണ അയ്യപ്പന്‍ മാത്രം. റോഡിന്റെ ശോചനീയ അവസ്ഥ പരിഹരിക്കാന്‍ അധികൃതരുടെ കണ്ണ് തുറപ്പിക്കാനായി
ഭഗവാന് വിളക്ക് പൂജയും ഭജനയും നടത്തുകയാണ് ഒരുപറ്റം വിശ്വാസികള്‍. മണ്ഡലകാലം ആരംഭിച്ചിട്ടും തകര്‍ന്ന റോഡ് നന്നാക്കാന്‍ അധികൃതര്‍ തയ്യാറാകാത്തതിനെതിരെയാണ് ഹിന്ദുഐക്യവേദിയുടെ ആഭിമുഖ്യത്തില്‍ നാട്ടുകാര്‍ വ്യത്യസ്ഥ സമരപരിപാടികളുമായി രംഗത്ത് വന്നത്. തൊടുപുഴ-പുളിയന്‍മല സംസ്ഥാന പാതയില്‍ ഹില്‍ടോപ്പിന് സമീപത്തുള്ള കോതവളവ് തകര്‍ന്ന് കിടക്കാന്‍ തുടങ്ങിയിട്ട് മാസങ്ങളായി ചെറുതും വലുതുമായ നിരവധി വാഹന അപകടങ്ങളില്‍ നിരവധി പേര്‍ക്ക് പരിക്കേല്‍ക്കുകയും ഒരാള്‍ മരിക്കുകയും ചെയ്തിരുന്നു.
മണ്ഡലകാലം ആരംഭിക്കുന്നതോടെ അന്യസംസ്ഥാന അയ്യപ്പ ഭക്തരുടേത് ഉള്‍പ്പെടെ നിരവധി വാഹനങ്ങള്‍ ഇതുവഴിയാണ് കടന്നുപോകേണ്ടത്. പാറക്കടവ് മുതല്‍ ഹില്‍ടോപ്പ് വരെയുള്ള ഹെയര്‍പിന്‍ വളുകള്‍ പൂര്‍ണമായും തകര്‍ന്ന് കിടക്കുകയാണ്. എന്നാല്‍ നാളിതുവരെയായിട്ടും യാതൊരു പരിഹാരവും അധികൃതരുടെ ഭാഗത്തു നിന്നും ഉണ്ടായിട്ടില്ല. റോഡ് ഉപരോധം ഉള്‍പ്പെടെയുള്ള സമമ
രങ്ങള്‍ വിവിധ സംഘടനകള്‍ നടത്തിയിട്ടുണ്ടെങ്കിലും ഇത്തരത്തിലുള്ള സമരപരിപാടികള്‍ ചുരുക്കമാണ്. ഈ റോഡിന്റെ രക്ഷക്ക് അയ്യപ്പന്‍ മാത്രം തുണ എന്ന ബോര്‍ഡും ഹിന്ദു ഐക്യവേദി പ്രവര്‍ത്തകര്‍ വളവില്‍ സ്ഥാപിച്ചിട്ടുണ്ട്. സമരപരിപാടികള്‍ക്ക് നേതാക്കളായ ടി.ആര്‍ ബിനു, രതീഷ് വരകുമല, പി.കെ പ്രകാശ്, ടി.ആര്‍ ബിജു, മനോജ് മാധവനിവാസ്, സുജാത രാജു എന്നിവര്‍ നേതൃത്വം നല്‍കി.
