കോഴിക്കോട്: നഗരത്തെ ഞെട്ടിച്ച് വന്‍ കവര്‍ച്ച. നടക്കാവില്‍ അര്‍ദ്ധരാത്രി വീട് കുത്തിത്തുറന്നാണ് ലക്ഷങ്ങള്‍ വിലവരുന്ന സ്വര്‍ണ്ണാഭരണങ്ങള്‍ കവര്‍ന്നത്. കൊട്ടാരം റോഡിലെ ഇലക്‌റിയോ ഹൗസില്‍ നിന്നാണ് 12 ന് രാത്രി 11.30ന് 208 പവന്‍ സ്വര്‍ണ്ണം, 8000 രൂപ എന്നിവ കവര്‍ന്നത്. 42,04800 രൂപയുടെ സാധനങ്ങളാണ് കവര്‍ച്ചചെയ്യപ്പെട്ടത്. മക്കളെല്ലാം വിദേശത്തായതിനാല്‍ രാത്രി തൊട്ടടുത്ത സഹോദരിയുടെ വീട്ടിലാണ് വീട്ടുടമസ്ഥ ആമിന കിടന്നുറങ്ങാറ്. ഇത് മനസ്സിലാക്കിയ മോഷ്ടാക്കള്‍ ആമിന സഹോദരിയുടെ വീട്ടില്‍ പോയ തക്കം നോക്കിയാണ് കവര്‍ച്ച നടത്തിയത്.
വീടിന്റെ മുന്‍ വാതില്‍ കുത്തിത്തുറന്ന് അകത്ത് കയറിയ മോഷ്ടാക്കള്‍ കിടപ്പു മുറിയിലെ അലമാരയില്‍ സൂക്ഷിച്ച സ്വര്‍ണ്ണാഭരണങ്ങളാണ് കവര്‍ന്നത്. ഡോഗ് സ്‌ക്വാഡും വിരലടയാള വിദഗ്ധരും പരിശോധന നടത്തി. സിറ്റി പോലീസ് കമ്മീഷണര്‍ ഉമ ബെഹ്‌റ, നോര്‍ത്ത് അസി. കമ്മീഷണര്‍ പൃഥ്വീരാജ് എന്നിവരും സ്ഥലത്തെത്തി. നടക്കാവ് പോലീസ് കേസ്സെടുത്ത് അന്വേഷണം ആരംഭിച്ചു.
