കോഴിക്കോട്: ഖനന സര്‍വെയെ നാട്ടുകാര്‍ തടഞ്ഞു. എലിയോട്ടമലയില്‍ ഖനനത്തിനായുള്ള സര്‍വെയാണ് ഇന്നലെ ഉച്ചയോടെ നാട്ടുകാര്‍ തടഞ്ഞത്. എലിയോട്ട്മലയെ തകര്‍ക്കുവാനുള്ള ഖനനമാഫിയകളുടെ നീക്കത്തെ പ്രതിരോധിക്കുമെന്ന് ബിജെപിസംസ്ഥാന ജനറല്‍ സെക്രട്ടറി കെ.സുരേന്ദ്രന്‍ പറഞ്ഞു. സംഭവസ്ഥലം സന്ദര്‍ശിച്ചതിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. നീര്‍മ്മറി പ്രദേശത്തെ സംരക്ഷിക്കുവാനുള്ള നാട്ടുകാരുടെ പോരാട്ടത്തിന് പിന്തുണയേകുമെന്നും സുരേന്ദ്രന്‍ പറഞ്ഞു. ബിജെപി ജില്ലാ പ്രസിഡന്റ് ടി.പി. ജയചന്ദ്രന്‍, സെക്രട്ടറി സി.പി.സതീഷ്, എലത്തൂര്‍ നിയോജകമണ്ഡലം പ്രസിഡന്റ് ടി. ദേവദാസ്, ജനറല്‍സെക്രട്ടറി സുരേഷ്, ജില്ലാസമിതി അംഗം അനൂപ് തുടങ്ങിയവരും കെ. സുരേന്ദ്രനൊപ്പമുണ്ടായിരുന്നു. ഗ്രാമപഞ്ചായത്ത് അധികൃതരും ജനപ്രതിനിധികളും സംഭവ സ്ഥലം സന്ദര്‍ശിച്ചു.
തലക്കുളത്തൂര്‍, അത്തോ ളി വില്ലേജുകളിലായി വ്യാപിച്ചുകിടക്കുന്ന എലിയോട്ടുമലയിലാണ് ഖനനത്തിനായി സര്‍വെ ആരംഭിച്ചത്. ജിയോളജിക്കല്‍ സര്‍വെ ഓഫ് ഇന്ത്യയുടെ നേതൃത്വത്തിലാണ് ഖനനസര്‍വെ നടത്തിയത്. എന്നാല്‍ ഗ്രാമപഞ്ചായത്ത് ഭരണസമിതികളെയോ, ജനപ്രതിനിധികളെയോ, ജില്ലാ ഭരണകൂടത്തെയോ അറിയിക്കാതെയും കാര്യങ്ങള്‍ ബോധ്യപ്പെടുത്താതെയുമാണ് സര്‍വെ നടത്തിയത്. 200 മീറ്റര്‍ ആഴത്തില്‍ സര്‍വെ നടത്താനുള്ള സാമഗ്രികളുമായാണ് സര്‍വെസംഘം എത്തിയത്. ദുരൂഹത നിറഞ്ഞ ഈ നടപടി നാട്ടുകാരില്‍ ശക്തമായ രോഷമാണ് ഉണ്ടാക്കിയിരിക്കുന്നത്. ജംകൊ കറ്റി എന്ന വിദേശപങ്കാളിത്തമുള്ള കമ്പനിക്കാണ് സര്‍വെയുടെ കരാര്‍ നല്‍കിയിരിക്കുന്നത്. ജില്ലയിലെ പ്രമുഖ ജൈവവൈവിധ്യമേഖലയും നാല് ഗ്രാമപഞ്ചായത്തുകളിലെ കൃഷിസ്ഥലത്തെ സംരക്ഷിക്കുന്ന നീര്‍മറി പ്രദേശം കൂടിയാണ് എലിയോട്ട്മല ജനറല്‍ മൈനിംഗ് കോര്‍പ്പറേഷന്‍ എന്ന സ്വകാര്യ കമ്പനിയുടെ നിയന്ത്രണത്തിലാണ് ഉള്ളത്. ഏകദേശം 217 ഏക്കര്‍ വിസ്തൃതിയിലുള്ളതാണ് ഖനനസ്ഥലം തൊട്ടടുത്തുള്ള ചെറുകാരാട്ട്മലയില്‍ 40 ഏക്കര്‍സ്ഥലവും ഇവരുടെ കൈവശമുണ്ട്. 2008ല്‍ അന്നത്തെ ഇടതുസര്‍ക്കാറാണ് ഇവര്‍ക്ക് 20 വര്‍ഷത്തേക്ക് ഖനനാനുമതി നല്‍കിയിരുന്നത്.
1968ല്‍ ഖനനത്തിനായുള്ളനീക്കം നടത്തിയിരുന്നുവെങ്കിലും ലാഭകരമല്ലെന്ന കീണ്ടത്തലിനെ തുടര്‍ന്ന് നീക്കം ഉപേക്ഷിക്കുകയായിരുന്നു. കഴിഞ്ഞവര്‍ഷം സ്വകാര്യകമ്പനി ഇവിടെ നിന്നും ധാതുശേഖരം സംഭരിക്കല്‍ നടത്തിയിരുന്നുവെങ്കിലും നാട്ടുകാര്‍ തടഞ്ഞിരുന്നു. രൂക്ഷമായ കുടിവെള്ളക്ഷാമവും പരിസ്ഥിതി പ്രശ്‌നവും നാടിനെയാകെ ദുരിതത്തിലാക്കുമ്പോള്‍ നീര്‍മറിപ്രദേശം കൂടിയായ എലിയോട്ട്മലയെ തകര്‍ക്കുവാനുള്ള ഏത് നീക്കത്തെയും ശക്തമായി ചെറുക്കുമെന്ന് നാട്ടുകാര്‍ മുന്നറിയിപ്പ് നല്‍കി. നാട്ടുകാര്‍ക്ക് പിന്തുണയുമായി രാഷ്‌ട്രീയ സാമൂഹ്യസാംസ്‌കാരിക രംഗത്തെ പ്രമുഖര്‍ ഉള്‍പ്പെടെ രംഗത്തുവന്നിട്ടുണ്ട്.
