ലിയോനാര്ഡ് കോഹന് സംഗീതജ്ഞന്, കവി, നോവലിസ്റ്റ് എന്നീ നിലകളില് ചുവടുറപ്പിച്ച ശേഷം, ലോസ് ആഞ്ചലസിനടുത്ത മൗണ്ട് ബാള്ഡി സെന് ക്ഷേത്രത്തിലേക്ക് പോയി. അഞ്ചുവര്ഷം, ആ ധ്യാനം നീണ്ടു. 1996 ല് അദ്ദേഹം റിന്സായ്സെന് ബുദ്ധമത സന്യാസിയായി-മൗനം എന്നര്ത്ഥമുള്ള, ജികാന് എന്ന പേരു സ്വീകരിച്ചു. അദ്ദേഹം ആശ്രമാധിപതി ക്വോസാന് ജോഷു സസാകി റോഷിയുടെ സഹചാരിയായി. ആശ്രമവര്ഷങ്ങള് 1996 ല് ‘വസന്തം’ എന്ന പേരില് ഡോക്യുമെന്ററിയായപ്പോള്, അതില് റോഷിയുമുണ്ടായിരുന്നു.
കനേഡിയന് ജൂതനായ കോഹന്, നൊബേല് സമ്മാന ജേതാവായ ബോബ് ഡിലന് കഴിഞ്ഞാല്, അടുത്ത സംഗീത ചക്രവര്ത്തിയാണ്. ധ്യാനം തീര്ത്ത്, 2001 ല് ‘പത്തു പുതിയ ഗീതങ്ങള്’ എന്ന ആല്ബവുമായി തിരിച്ചെത്തി. ആല്ബത്തില്, ഗ്രീക്ക് കവി, കോണ്സ്റ്റന്റൈന് കവാഫി എഴുതിയ, ‘ആന്റണിയെ ദൈവം കൈവിടുന്നു’ എന്ന കവിതയുണ്ടായിരുന്നു. യിവാനിസ് സ്മാര്ഗ്ദിസ് എന്ന ഗ്രീക്ക് സംവിധായകന് കവാഫിയുടെ ജീവിതം ആധാരമാക്കിയെടുത്ത കവാഫി (1996) എന്ന ചിത്രം ഞാന് കണ്ടിട്ടുണ്ട്. ആ ചിത്രത്തിന്റെ ഉള്ളടക്കം തന്നെ, മൗനമാണ്.
സ്പാനിഷ് ആഭ്യന്തരയുദ്ധത്തില് കൊല്ലപ്പെട്ട വിഖ്യാത നാടകകൃത്ത് ഫെഡറിക്കോ ഗാര്സിയ ലോര്ക്കയുടെ ആരാധകനായിരുന്ന കോഹന്, മകള്ക്ക് ലോര്ക്ക എന്നു പേരിട്ടു. 2004 ല് കോഹന് തന്റെ മാനേജര് കെല്ലി ലിഞ്ചിനെ സംശയിക്കാന് തുടങ്ങി. ലോര്ക്കയും ആശങ്ക പങ്കുവച്ചു. ലിഞ്ച് നടത്തിയ 75000 ഡോളറിന്റെ അനധികൃത ക്രെഡിറ്റ് കാര്ഡ് ഇടപാട് കണ്ടെത്തി. പിന്നെ, തന്റെ റിട്ടയര്മെന്റ്/സംഭാവന നിധിയില്നിന്ന്, 50 ലക്ഷം ഡോളര് കളവുപോയതായി കോഹന് കണ്ടെത്തി. അക്കൗണ്ടില് 1,50,000 ഡോളറേ ഉണ്ടായിരുന്നുള്ളൂ. കോഹന്റെ ബിസിനസ് പങ്കാളികള് അദ്ദേഹത്തിനെതിരെ കേസുകള് കൊടുത്തു. 2006 ല് കോഹന് 13 വര്ഷത്തിനിടയില് ആദ്യമായി, വേദിയിലെത്തി-ബുക് ഓഫ് ലോങിങ് ആയിരുന്നു, ആല്ബം-അഭിലാഷത്തിന്റെ പുസ്തകം.
ജീവിതത്തിലുടനീളം, വിഷാദരോഗ ബാധിതനായിരുന്നു, കോഹന്. ആദ്യകാല രചനകളില് വിഷാദവും ആത്മഹത്യയും വിഷയങ്ങളായി. സന്യാസം വിട്ട വര്ഷങ്ങളില്, മുക്തിയും വിഷയമായി.
