രാജ്കോട്ട്: ചേതേശ്വര് പുജാരയുടേയും മുരളി വിജയ്യുടേയും സെഞ്ചുറി മികവില് ഇന്ത്യ തിരിച്ചടിക്കുന്നു. ഇംഗ്ലണ്ട് ഉയര്ത്തിയ 537 റണ്സ് പിന്തുടരുന്ന ഇന്ത്യ ഒടുവില് വിവരം ലഭിക്കുമ്പോള് രണ്ട് വിക്കറ്റ് നഷ്ടത്തില് 300 കടന്നു.
പുജാരയും (124), മുരളി വിജയ്യും (126*) ചേര്ന്ന് രണ്ടാം വിക്കറ്റില് ഇതുവരെ 185 റണ്സ് കൂട്ടിച്ചേര്ത്തിട്ടുണ്ട്. 29 നേടിയ ഗൗതം ഗംഭീറിന്റെയും പൂജാരയുടെയും വിക്കറ്റുകളാണ് ഇന്ത്യക്കു മൂന്നാം ദിനം നഷ്ടമായത്. പുജാരയുടെ എട്ടാം ടെസ്റ്റ് സെഞ്ചുറിയാണിത്. ന്യൂസിലന്ഡിനെതിരായ അവസാന ടെസ്റ്റിലും പുജാര സെഞ്ചുറി നേടിയിരുന്നു.
നേരത്തെ, ജോ റൂട്ട്, മൊയിന് അലി, ബെന് സ്റ്റോക്സ് എന്നിവരുടെ സെഞ്ചുറികളുടെ മികവിലാണ് ഇംഗ്ലണ്ട് ഒന്നാം ഇന്നിംഗ്സില് കൂറ്റന് സ്കോര് അടിച്ചുകൂട്ടിയത്. ഇംഗ്ലണ്ട് ഇന്ത്യന് മണ്ണില് കുറിക്കുന്ന മൂന്നാമത്തെ വലിയ സ്കോറാണിത്. 1985ല് നേടിയ 652/7 എന്നതാണ് ഉയര്ന്ന സ്കോര്. മൂന്നു വര്ഷത്തിനുശേഷമാണ് ഇന്ത്യന് മണ്ണില് ഒരു സന്ദര്ശക ടീം ബാറ്റ്സ്മാന് സെഞ്ചുറി നേടുന്നത്. 2013ല് ക്ലാര്ക്കാണ് ജോ റൂട്ടിന്റെ മുന്ഗാമി.
ഇന്ത്യയ്ക്ക് വേണ്ടി രവീന്ദ്ര ജഡേജ മൂന്നും ഉമേഷ് യാദവ്, ആര്.അശ്വിന്, മുഹമ്മദ് ഷമി എന്നിവര് രണ്ടു വീതം വിക്കറ്റുകളും നേടി. വിക്കറ്റ് നഷ്ടപ്പെടാതെ 63 എന്ന നിലയിലാണ് ഇന്ത്യ മൂന്നാം ദിനം ബാറ്റിങ് പുനഃരാരംഭിച്ചത്.
