കോഴിക്കോട്: മലപ്പുറം കളക്ട്രേറ്റിലുണ്ടായ സ്ഫോടനത്തിന്റെ പശ്ചാത്തലത്തില് കോഴിക്കോട് കളക്ടറേറ്റ് വളപ്പിലും ഓഫീസുകളിലും ശക്തമായ സുരക്ഷാ ക്രമീകരണങ്ങളും നിരീക്ഷണ സംവിധാനവും ഏര്പ്പെടുത്താന് ജില്ലാ കളക്ടര് എന്.പ്രശാന്തിന്റെ അദ്ധ്യക്ഷതയില് ചേര്ന്ന ജില്ലാ ദുരന്ത നിവാരണ സമിതി യോഗം തീരുമാനിച്ചു.
സിവില് സ്റ്റേഷനിലേക്കുളള വാഹനങ്ങളുടെ വരവ് നിയന്ത്രിക്കും. കളക്ടറേറ്റിന്റെ പ്രധാന കവാടത്തില് പാര്ക്ക് ചെയ്യുന്ന വാഹനങ്ങള്ക്കെതിരെ നടപടി സ്വീകരിക്കും. വിവിധ ആവശ്യത്തിനായി എത്തുന്നവരുടെ സ്വകാര്യ വാഹനങ്ങള്ക്ക് ഗേറ്റിന് പുറത്ത് പാര്ക്കിംഗ് സൗകര്യം ഒരുക്കും. പ്രധാന ഗേറ്റുകളിലും പ്രധാന ഓഫീസുകളുടെ പരിസരങ്ങളിലും നിരീക്ഷണ ക്യാമറകള് സ്ഥാപിക്കും. ഇതിനായി പുതിയ എസ്റ്റിമേറ്റ് തയ്യാറാക്കാന് പി.ഡബ്ല്യു.ഡി ഇലക്ട്രോണിക്സ് വിഭാഗത്തെ ചുമതലപ്പെടുത്തും. കലക്ടറേറ്റിന്റെ വിവിധ ഇടങ്ങളില് കൂടുതല് പൊലീസുകാരെ നിയോഗിക്കാനും തീരുമാനിച്ചു.
കളക്ടറേറ്റിലെയും മറ്റ് ഓഫീസുകളിലേയും മുഴുവന് ജീവനക്കാര്ക്കും തിരിച്ചറിയല് കാര്ഡ് നിര്ബന്ധമാക്കും. തിരിച്ചറിയല് കാര്ഡ് വിതരണം ഉടനടി പൂര്ത്തിയാക്കാന് കലക്ടര് നിര്ദ്ദേശം നല്കി. ഓഫീസുകളില് വില്പനക്കാര് കയറിയിറങ്ങുന്നത് തടയും. ഓഫീസ് സമയങ്ങളില് ആളുകള് വിവിധ സാധനങ്ങള് വില്പന നടത്തുന്നത് ശ്രദ്ധയില്പെട്ടിട്ടുണ്ട്. ഇത് അവസാനിപ്പിക്കാന് ഓഫീസ് മേധാവികള് നടപടി സ്വീകരിക്കേണ്ടതാണെന്ന് കളക്ടര് പറഞ്ഞു. കേസുകളുമായി ബന്ധപ്പെട്ട് കലക്ടറേറ്റ് വളപ്പില് സൂക്ഷിച്ചിട്ടുളള പഴകിയ വാഹനങ്ങള് നീക്കും. ജീവനക്കാരുടെ വാഹനങ്ങള്ക്ക് പാസ് ഏര്പ്പെടുത്താനും തീരുമാനിച്ചു.
എ.ഡി.എം. ടി. ജനില്കുമാര്, സിറ്റി പൊലീസ് കമ്മിഷണര് ഉമ ബെഹ്റ, ഡെപ്യൂട്ടി കളക്ടര് ബി. അബ്ദുള് നാസര്, ഫിനാന്സ് ഓഫീസര് ജെസ്സി ഹെലന് ഹമീദ് എന്നിവര് പങ്കെടുത്തു.
