അബുദബി: ഒരു നമ്പര് പ്ളേറ്റിനു വേണ്ടി 60 കോടി രൂപ മുടക്കുക.. വില കൂടിയ കാറുകള് വാങ്ങിക്കൂട്ടുക. അതാണ് ബല്വിന്ദര് സാഹ്നിയെന്ന പഞ്ചാബി. അരക്കിറുക്കനെന്ന് നാം വിളിച്ചേക്കും. പണത്തിന്റെ അഹങ്കാരമെന്ന് നാം അപഹസിച്ചേക്കും. പക്ഷെ യുഎഇയിലെ ഷെയ്ഖുമാരേക്കാള് സമ്പന്നനാണ് ഈ ഭാരതീയന്. ദുബായിയിലെ വസ്തു ബിസിനസുകാരന്, കെട്ടിട നിര്മ്മാതാവ്, വ്യവസായി…
ആഴ്ചകള്ക്കു മുന്പാണ് ഡി 5 എന്ന കാര് നമ്പറിനുവേണ്ടി സാഹ്നി 9മില്ല്യന് ഡോളര് (60 കോടി രൂപ) മുടക്കിയത്. നമ്പര് പ്ളേറ്റിനു വേണ്ടി ഇത്രയും വലിയ തുക മുടക്കിയ അപൂര്വ്വ വ്യക്തി. തന്നെ തടഞ്ഞുനിര്ത്തി പരിചയപ്പെട്ട് ഒപ്പം ഒരു ഫോട്ടോയെടുക്കാന് ആഗ്രഹിക്കുന്നവര് ദിനംപ്രതി കൂടുകയാണെന്നതില് സാഹ്നിക്ക് പെരുത്ത സന്തോഷം.
ആറു റോള്സ് റോയിസ് കാറാണ് കക്ഷിക്കുള്ളത്. രണ്ടെണ്ണം ബുക്ക് ചെയ്തിട്ടുമുണ്ട്. ഇതിലൊരെണ്ണത്തിനാണ് ഈ നമ്പര് പ്ളേറ്റ്. മറ്റൊരു നമ്പര് പ്ളേറ്റിന് സാഹ്നി മുടക്കിയത് 45 കോടി രൂപയാണ്. അതും ഒരു റോള്സ് റോയിസിന് വച്ചു. ദുബായിയില് ആദായ നികുതിയില്ല. അതിനാല് ഇങ്ങനെ മുടക്കുന്ന പണം പൊതുഖജനാവില് ചെല്ലുന്നതില് സന്തോഷം. സാഹ്നി പറയുന്നു
