കൊച്ചി: നവതിയിലേക്കു പ്രവേശിച്ച പ്രഫ.എം.കെ. സാനുവിനു സീറോ മലബാര് സഭ മേജര് ആര്ച്ച്ബിഷപ് കര്ദിനാള് മാര് ജോര്ജ് ആലഞ്ചേരിയുടെയും സഹായമെത്രാന്മാരുടെയും ആദരം. ഇന്നലെ വൈകുന്നേരം എറണാകുളം മേജര് ആര്ച്ച്ബിഷപ്സ് ഹൗസിലെത്തിയ പ്രഫ. സാനുവിനെ കര്ദിനാള് മാര് ആലഞ്ചേരി പൊന്നാടയണിയിച്ച് ആദരിച്ചു. സഹായമെത്രാന്മാരായ മാര് സെബാസ്റ്റ്യന് എടയന്ത്രത്ത്, മാര് ജോസ് പുത്തന്വീട്ടില് എന്നിവര് ബൊക്കെ നല്കി.
സാംസ്കാരിക, മാനവിക മൂല്യങ്ങള്ക്കായി ചിന്തകളെയും അക്ഷരങ്ങളെയും ഉപയോഗപ്പെടുത്തിയ മഹദ്വ്യക്തിത്വമാണു പ്രഫ.എം.കെ. സാനുവെന്നു കര്ദിനാള് പറഞ്ഞു. ക്രിസ്തുവിന്റെ സന്ദേശങ്ങളോടും ക്രൈസ്തവസഭകളുടെ സേവനപ്രവര്ത്തനങ്ങളോടും എന്നും ആദരവു പുലര്ത്തിയിട്ടുള്ള തനിക്ക് സഭാനേതൃത്വം നല്കിയ ഹൃദ്യമായ സ്വീകരണം അതീവ സന്തോഷകരമാണെന്ന് പ്രഫ.എം.കെ. സാനു മറുപടി പ്രസംഗത്തില് പറഞ്ഞു. ബുദ്ധനും ക്രിസ്തുവും തന്റെ ചിന്തകളിലും പഠനങ്ങളിലും വലിയ സ്വാധീനം ചെലുത്തിയിട്ടുണ്ട്.
കുട്ടികള്ക്കുള്ളിലുള്ള നന്മകളെ പ്രചോദിപ്പിക്കാന് അധ്യാപകര്ക്കു സാധിക്കണം. അതിലൂടെ സമൂഹത്തില് ഇനിയും വലിയ നന്മകള് വിടരേണ്ടതുണ്ടെന്നും പ്രഫ. സാനു പറഞ്ഞു. അതിരൂപത പ്രോ വികാരി ജനറാള് മോണ്. സെബാസ്റ്റിയന് വടക്കുംപാടന്, ഇംഗ്ലീഷ് സത്യദീപം ചീഫ് എഡിറ്റര് റവ.ഡോ. പോള് തേലക്കാട്ട്, ചാന്സലര് റവ.ഡോ. ജോസ് പൊള്ളയില്, പ്രൊക്യുറേറ്റര് ഫാ. ജോഷി പുതുവ, കൂരിയയിലെ വൈദികര് തുടങ്ങിയവര് പങ്കെടുത്തു.
