ചിറക്കടവ് മണക്കാട്ട് ശ്രീ ഭദ്രാക്ഷേത്രത്തില് ദേവിക്ക് എഴുന്നള്ളാന് നിര്മ്മിക്കുന്ന രഥത്തിന്റെ മാതൃക
കോട്ടയം ജില്ലയിലെ ചിറക്കടവ് മണക്കാട്ട് ശ്രീഭദ്രാക്ഷേത്രത്തിലെ ഉത്സവത്തിന് ഇനി ആനകളില്ല. ആനകളുടെ സ്ഥാനത്ത് ദേവിയെ എഴുന്നള്ളിക്കാന് രഥം സജ്ജമാക്കുന്നതിനുള്ള തയ്യാറെടുപ്പിലാണ് ദേവസ്വം ഭരണസമിതി.
മദ്ധ്യതിരുവിതാംകൂറില് പൊതുവേ ആനകളെ ഉപയോഗിച്ചാണ് എഴുന്നള്ളിപ്പ്. കുറഞ്ഞത് മൂന്ന് ആനകളെങ്കിലും ഉണ്ടാകണം. ആനച്ചമയങ്ങള് ഉള്പ്പെടെ ഓരോ ആനയ്ക്കും ഒരുലക്ഷത്തിലധികം രൂപ ചെലവ് വരും. ഇതിന് പുറമെ വനംവകുപ്പിന്റെയും എലിഫന്റ് സ്ക്വാഡിന്റെയും മുന്കൂര് അനുമതിയും ആവശ്യമാണ്. മുന്കാലത്ത് അഞ്ച് ആനകളെ അണിനിരത്തിയിരുന്ന മണക്കാട് ഉത്സവത്തില് കഴിഞ്ഞ കുറേ വര്ഷങ്ങളായി ആനകളുടെ എണ്ണം കുറച്ചുകൊണ്ടുവരികയായിരുന്നു. കഴിഞ്ഞവര്ഷം ഒരാനയെ മാത്രം ഉപയോഗിച്ചാണ് ഉത്സവം നടത്തിയത്. ഈ പതിവ് രീതിക്കാണ് മാറ്റം വരുത്തുന്നത്.
ദേവീഹിതം അനുസരിച്ചും താന്ത്രിക വിധിപ്രകാരവുമാണ് രഥനിര്മ്മാണം നടന്നുവരുന്നത്. രഥനിര്മ്മാണം പൂര്ത്തിയാകുന്നതോടെ പുതിയൊരു രഥോത്സവകാഴ്ചയിലേക്ക് ചിറക്കടവും മിഴിതുറക്കും. ഡിസംബര് 26ന് കൊടിയേറുന്ന ഇത്തവണത്തെ ഉത്സവം മുതല് എഴുന്നള്ളിപ്പിന് രഥം ഉപയോഗിക്കും. ദേവവൃക്ഷത്തില് നിര്മ്മിക്കുന്ന രഥത്തില് 32ശില്പ്പങ്ങളും നിറയെ കൊത്തു പണികളുമാണുള്ളത്. 12അടി ഉയരവും മൂന്ന് ടണ് ഭാരവുമുണ്ട്.
തമിഴകത്തെ പ്രമുഖ സ്ഥപതി പൊന്രാധകൃഷ്ണന്റെ നേതൃത്വത്തില് കുംഭകോണത്തെ പണിശാലയിലാണ് രഥനിര്മ്മാണം നടക്കുന്നത്. ഇതിന്റെ മുന്നോടിയായി കുംഭകോണം ആദികുംഭേശ്വര ക്ഷേത്രത്തിലും മണക്കാട് ശ്രീഭദ്രാക്ഷേത്രത്തിലും പ്രത്യേക പൂജകള് ഒരേ സമയത്ത് നടന്നു. രഥം ഡിസംബര് ഒന്നിന് മണക്കാട്ടമ്മയ്ക്ക് സമര്പ്പിക്കും.
