മറയൂര്: ഇടുക്കിയെ സമ്പൂര്ണ്ണ ഒഡിഎഫി ജില്ലായായി പ്രഖ്യാപിച്ച ശേഷവും പൊതു ശൗചാലയമില്ലാതെ കാന്തല്ലൂര്, കോവില്കടവ് ഗ്രാമങ്ങള്.
കാന്തല്ലൂര് പഞ്ചായത്തിന്റെ കീഴില് വരുന്ന സ്ഥലങ്ങളാണ് ഇവ. ദിവസവും നൂറുക്കണക്കിന് വിനോദ സഞ്ചാരികളെത്തുന്ന ഇടങ്ങള്. എന്നിട്ടും ഒരിടത്ത് പോലും ഇവര്ക്ക് വേണ്ട പ്രാഥമിക സൗകര്യമൊരുക്കാന് അധികൃതര്ക്കായിട്ടില്ല. ഇവിടങ്ങളിലെ കൃഷിതോട്ടങ്ങള്ക്കാണാനും കരിമ്പിന് പാടങ്ങള് കാണാനുമാണ് സഞ്ചാരികളെത്തുന്നത്. ഇവര്ക്ക് പ്രാഥമിക ആവ ശ്യങ്ങള്ക്ക് വഴിയരികുകളിലെ വീടുകളെ ആശ്രയിക്കേണ്ട ഗതികേടാണ്. അതേ സമയം വെള്ളത്തിന്റെ ദൗര്ലഭ്യവും സഞ്ചാരികളെ അലട്ടുന്നുണ്ട്.
മുന്പ് ഇവിടെ രണ്ടിടത്തും ശൗചാലയങ്ങള് ഉണ്ടായിരുന്നതാണ്. കാന്തല്ലൂരിലേത് ശുചീകരിക്കാനാകാതെ പൈപ്പ് ഉള്പ്പെടെയുള്ളവ പൊട്ടി നശിക്കുകയായിരുന്നു. കോവില്ക്കടവിലേത് പാറപ്പുറത്തായിരുന്നതിനാല് വെള്ളം ലഭിക്കാതെ പൂട്ടുകയായിരുന്നു. ദുര്ഗന്ധവും നാട്ടുകാരുടെ പരാതിയും രണ്ടിടങ്ങളിലും പരിഹരിക്കാന് അധികൃതര്ക്കായില്ല.
എന്നാല് പുതിയത് നിര്മ്മിക്കാന് ഫണ്ട് കിട്ടിയിട്ടുണ്ടെന്നാണ് പഞ്ചായത്ത് അധികൃതരുടെ വിശദീകരണം. ഇതിന് സ്ഥലമില്ലാത്തതിനാല് കളക്ടര്ക്ക് പരാതി നല്കിയിട്ടുണ്ട്. ഉടനെ സ്ഥലം ലഭിക്കുമെന്നാണ് പ്രതീക്ഷയെന്നും അധികൃതര് പറഞ്ഞു. പൊതു സ്ഥലങ്ങളില് പോലും സൗകര്യമേര്പ്പെടുത്താതെയുള്ള നടത്തിയ തിരക്കിട്ട ഒഡിഎഫ് പ്രഖ്യാപനം പൊളിയെന്ന ആരോപണവും ശക്തമാണ്.മേഖലയിലെ ജലദൗര്ലഭ്യം പരിഹരിക്കാന് സര്ക്കാരിന്റെ അടിയന്തിര ഇടപ്പെടല് വേണമെന്നും നാട്ടുകാര് ആവശ്യപ്പെടുന്നു.
