ഉന്നത രാഷ്‌ട്രീയ ഇടപെടലെന്ന് ആരോപണം മദ്യവില്‍പന ശാലയിലെ കവര്‍ച്ച: അന്വേഷണം നിലച്ചു

പൊന്‍കുന്നം: കണ്‍സ്യൂമര്‍ഫെഡിന്റെ മദ്യവില്‍പന ശാലയില്‍ നടന്ന കവര്‍ച്ചയുടെ അന്വേഷണം പാതിവഴിയില്‍ നിലച്ചു. സംഭവം നടന്ന ആഴ്ചയില്‍ അന്വേഷണം സജീവമായി നടന്നിരുന്നു. എന്നാല്‍ ഇപ്പോള്‍ പോലീസ് കേസന്വേഷണം അവസാനിപ്പിച്ച നിലയിലാണ്. സ്ഥാപനത്തിലെ ജീവനക്കാരില്‍ ഒരാള്‍ പോലീസിനോട് കുറ്റസമ്മതം നടത്തിയിട്ടും തുടര്‍ അന്വേഷണം നിലച്ചു. കുറ്റസമ്മതം നടത്തിയ ആളെ കസ്റ്റഡിയില്‍ വാങ്ങാതിരുന്നതും കൂടുതല്‍ അന്വേഷണം നടത്താന്‍ പോലീസ് തയ്യാറാകാത്തതും ദുരൂഹത ഉണ്ടെന്ന് ആക്ഷേപം ഉയര്‍ന്നു.

യൂണിയന്‍ തലത്തില്‍ ഇയാള്‍ക്ക് വേണ്ടി ഉന്നതതലത്തില്‍ സമ്മര്‍ദം ചെലുത്തിയതായും ആരോപണം ഉയര്‍ന്നിട്ടുണ്ട്. ജീവനക്കാരില്‍ ചിലരുടെ സഹായത്തോടെ പുറത്തു നിന്നും എത്തിയവര്‍ കവര്‍ച്ച നടത്തിയിരിക്കാമെന്ന നിഗമനത്തില്‍ ഉറച്ചു നിന്ന പോലീസ് തുടര്‍ന്നുള്ള അന്വേഷണം നിര്‍ത്തിയത് രാഷ്‌ട്രീയ ഇടപെടല്‍ മൂലമാണെന്നുള്ള ആരോപണത്തിന് ശക്തി പകരുന്നതാണ്.

കഴിഞ്ഞ ഓണക്കാലത്ത് ഉത്രാട തലേന്നാണ് നഗരത്തില്‍ ദേശീയപാതക്ക് സമീപമുള്ള വില്‍പന കേന്ദ്രത്തില്‍ മോഷണം നടന്നത്. തുടര്‍ച്ചയായി രണ്ട് അവധിദിനങ്ങളിലെ കളക്ഷന്‍ തുകയായ 22,44,580 രൂപയാണ് സ്ഥാപനത്തിലെ സേഫിനുള്ളില്‍ സൂക്ഷിച്ചിരുന്നത്. ഇതില്‍ 4,15,330 രൂപ സേഫില്‍ ബാക്കി വച്ച നിലയിലായിരുന്നു. സേഫിന്റെ ഒരു വശത്ത് കമ്പിപ്പാര ഉപയോഗിച്ച് ചെറിയ കീറല്‍ മാത്രമാണ് വരുത്തിയിരുന്നത്. ഈ വിടവിലൂടെ പണം എടുക്കുന്നത് അതീവദുഷ്‌കരമാണെന്ന് കണ്ടെത്തിയതോടെയാണ് സംശയമുന ജീവനക്കാരിലേക്കും നീണ്ടത്. സേഫ് തകര്‍ക്കാന്‍ ഉപയോഗിച്ച കമ്പിപ്പാര മദ്യപ്പെട്ടികളുടെ ഇടയില്‍ നിന്ന് കണ്ടെത്തിയിരുന്നു. സേഫിന്റെ വാതില്‍ തുറന്നതിന് ശേഷമാണ് അലവാങ്ക് ഉപയോഗിച്ച് സേഫില്‍ കേടുവരുത്തിയതെന്ന് ശാസ്ത്രീയ അന്വേഷണ വിദഗ്ധര്‍ കണ്ടെത്തിയിരുന്നു.

കവര്‍ച്ചയില്‍ പങ്കുണ്ടെന്ന് പോലീസിനോട് സമ്മതിച്ച ജീവനക്കാരനുമായി അടിമാലിയില്‍ ഉള്‍പ്പെടെ എത്തി അന്വേഷണം നടത്തിയെങ്കിലും തെളിവുകള്‍ ലഭിച്ചിരുന്നില്ല. അടിമാലിയിലെ മദ്യവില്‍പന ശാലയിലെ തീപിടുത്തവുമായി ബന്ധപ്പെട്ടാണ് ഇയാളെ പൊന്‍കുന്നത്തിന് സ്ഥലം മാറ്റിയിരുന്നത്. മുമ്പ് പീരുമേട്ടില്‍ ജോലി ചെയ്യവെ രണ്ട് ലക്ഷം രൂപയുടെ ക്രമക്കേട് നടത്തിയതുമായി ബന്ധപ്പെട്ടും ഇയാള്‍ക്കെതിരെ ആരോപണമുയര്‍ന്നിരുന്നുവെന്നും പോലീസ് കണ്ടെത്തിയിരുന്നു.

ചോദ്യചെയ്യലില്‍ പരസ്പര വിരുദ്ധമായ കാര്യങ്ങള്‍ പറഞ്ഞ് കേസന്വേഷണം വഴിതിരിച്ചു വിടാന്‍ ഇയാള്‍ ശ്രമിക്കുന്നതായി പോലീസ് സംശയിച്ചിരുന്നു. സംഭവം നടന്ന് ഒരു മാസം പിന്നിട്ടിട്ടും പ്രതികളെ പിടികൂടാന്‍ കഴിയാതെ അന്വേഷണം നിര്‍ത്തിയതില്‍ പ്രതിഷേധം ശക്തമാണ്.