മാഡ്രിഡ്: സ്പാനിഷ് ലീഗ് ഫുട്ബോളില് വിയ്യ റയലിന് മിന്നും ജയം. സെല്റ്റ ഡി വിഗൊയെ മടക്കമില്ലാത്ത അഞ്ചു ഗോളിന് തുരത്തി വിയ്യ. റോബര്ട്ടൊ സൊറിനൊയുടെ ഇരട്ട ഗോളുകള് വന് ജയത്തിനു പിന്നില്. സെഡ്രിക് ബകാംബു, ട്രിഗ്വിയെറൊസ് എന്നിവരും ഡാനിയല് വാസിന്റെ സെല്ഫ് ഗോളും അകമ്പടി.
മറ്റൊരു കളിയില് അത്ലറ്റിക് ക്ലബ് 3-2ന് റയല് സോസിഡാഡിനെ കീഴടക്കി. മുനിയന്, അദൂരിസ്, ഇനാകി വില്യംസ് എന്നിവര് അത്ലറ്റിക്കിനായി സ്കോര് ചെയ്തപ്പോള്, സുരുറ്റുസ, ഇനിഗൊ മാര്ട്ടിനെസ് സോസിഡാഡിന്റെ ഗോള് നേട്ടക്കാര്. മറ്റൊരു കളിയില് ഡിപൊര്ട്ടീവൊ ആല്വ്സ്, മലാഗയെ പിടിച്ചുനിര്ത്തി (1-1).
മിലാനു ജയം, ഇന്ററിനു തോല്വി
മിലാന്: ഇറ്റാലിയന് സീരി എയില് മിലാന് ടീമുകള്ക്ക് സമ്മിശ്രം. എസി മിലാന് 3-1ന് ചീവൊയെ കീഴടക്കിയപ്പോള്, ഇന്റര് മിലാന് കാഗ്ലിയാരിയോട് തോറ്റു (2-1).
എവേ മത്സരത്തില് ജുരാജ് കുക്ക, മബയേ നിയാങ് എന്നിവരുടെ ഗോളുകളും ഡാരിയൊ ഡയ്നെല്ലിയുടെ സെല്ഫ് ഗോളുമാണ് മിലാന് വന് ജയം സമ്മാനിച്ചത്. വാള്ട്ടര് ബിര്സ ചീവൊയുടെ ആശ്വാസം.
തട്ടകത്തില് 85ാം മിനിറ്റില് സമീര് ഹാന്ഡൊവിച്ചിലൂടെ പിറന്ന സെല്ഫ് ഗോളില് ഇന്ററിന്റെ തോല്വി. 55ാം മിനിറ്റില് ജോവൊ മരിയൊയിലൂടെ മുന്നിലെത്തിയ ഇന്ററിനെതിരെ ഫെഡെറികൊ മെല്ചിയോറിയിലൂടെ ഒപ്പമെത്തിയിരുന്നു കാഗ്ലിയാരി. ഫിയൊന്റീന-അറ്റ്ലാന്റ, ജെനോവ-എംപോളി മത്സരങ്ങള് ഗോള്രഹിത സമനിലയില്.
ഓസ്റ്റിനിലൂടെസതാംപ്ടണ്
ലണ്ടന്: ഇംഗ്ലീഷ് പ്രീമിയര് ലീഗില് സതാംപ്ടണിനു ജയം. ബേണ്ലിയെ ഒന്നിനെതിരെ മൂന്നു ഗോളിന് കീഴടക്കി സതാംപ്ടണ്. ചാര്ലി ഓസ്റ്റിന്റെ ഇരട്ട പ്രഹരമാണ് സതാംപ്ടണിന് മികച്ച ജയമൊരുക്കിയത്. 52, 66 മിനിറ്റുകളില് ഓസ്റ്റിന് ഗോള് നേടി. നഥാന് റെഡ്മോണ്ടും സ്കോറര്. സാം വോക്സ് ബേണ്ലിയുടെ ആശ്വാസം.
വാറ്റ്ഫോഡ് 1-0ന് മിഡില്സ്ബറൊയെ തോല്പ്പിച്ചു. 54ാം മിനിറ്റില് ജോസ് ഹൊലെബാസ് സ്കോറര്.
വോള്ഫ്സ്ബര്ഗ് വീണു
ബെര്ലിന്: ജര്മന് ഫുട്ബോള് ലീഗില് വോള്ഫ്സ്ബര്ഗിന് തോല്വി. ആര്ബി ലെയ്പ്സിഗ്ഗിനോട് എതിരില്ലാത്ത ഒരു ഗോളിനു തോറ്റു. 70ാം മിനിറ്റില് എമില് ഫോഴ്സ്ബര്ഗ് സ്കോറര്.
മറ്റൊരു കളിയില് മെയ്ന്സ് 2-1ന് ഡാംസ്റ്റ്ഡ്റ്റിനെ കീഴടക്കി. പാബ്ലൊ ഡി ബ്ലാസിസ്. യൂനുസ് മല്ലി മെയ്ന്സിന്റെ സ്കോറര്മാര്. ജെറൊം ഗൊണ്ടൊര്ഫ് ഡാംസ്റ്റഡ്റ്റിന്റെ ആശ്വാസം.
മാഴ്സലെ രക്ഷപെട്ടു
മാഴ്സലെ: ഫ്രഞ്ച് ഫുട്ബോള് ലീഗില് ഒളിമ്പിക് മാഴ്സലെയ്ക്ക് ജയം. എതിരില്ലാത്ത ഒരു ഗോളിന് മെറ്റ്സിനെ കീഴടക്കി. 13ാം മിനിറ്റില് ബഫേറ്റിംബി ഗോമസ് സ്കോറര്. റെന്നസ്-ബോര്ഡ്യൂക്സ് (1-1), സെന്റ് എറ്റെയ്ന്-ദിയോന് (1-1) മത്സരങ്ങള് സമനിലയില്.
