ന്യൂദല്ഹി: കമ്യൂണിസത്തിനും മുതലാളിത്തത്തിനും ബദലായി ഏകാത്മ മാനവദര്ശനം മുന്നോട്ടുവച്ച പണ്ഡിറ്റ് ദീനദയാല് ഉപാധ്യായയുടെ സമ്പൂര്ണ കൃതികള് 15 വാല്യങ്ങളായി പ്രസിദ്ധീകരിക്കുന്നു. രാജസ്ഥാനില് നിന്നുള്ള മുന് രാജ്യസഭാംഗം മഹേഷ്ചന്ദ്രശര്മയാണ് കൃതികള് സമാഹരിച്ച് എഡിറ്റ് ചെയ്തിട്ടുള്ളത്. ദീനദയാല് ജന്മശതാബ്ദിയാഘോഷത്തിന്റെ ഭാഗമായി ദല്ഹിയില് ഇന്ന് സംഘടിപ്പിക്കുന്ന ചടങ്ങില് പ്രധാനമന്ത്രി നരേന്ദ്ര മോദി പ്രകാശനം ചെയ്യും.
സമാഹാരത്തില് പന്ത്രണ്ടാം വാല്യമായി ഏകാത്മമാനവദര്ശനം ഉള്പ്പെടുത്തിയിരിക്കുന്നു. പാക്കിസ്ഥാന്, ചൈന, ഭാരത സമ്പദ്വ്യവസ്ഥ, തൊഴില്, ശ്രീകൃഷ്ണന്, ബുദ്ധമതം, സാങ്കേതികവിദ്യ, ഭാരതീയ വനിതകള്, സംസ്കാരം തുടങ്ങിയവയെക്കുറിച്ച് ഉപാധ്യായ എഴുതുകയും പ്രസംഗിക്കുകയും ചെയ്തിട്ടുള്ളത് സമാഹാരത്തിലുണ്ട്.
ഏകാത്മമാനവദര്ശന് പ്രതിഷ്ഠാന് പ്രസിഡന്റുകൂടിയായ മഹേശ്ചന്ദ്രയുടെ 30 വര്ഷത്തെ ശ്രമഫലമാണ് സമ്പൂര്ണ കൃതികള്. ആര്എസ്എസ് മുന് സര്സംഘചാലകും, ഉപാധ്യായ രാഷ്ട്രീയത്തിലേക്ക് നിയോഗിച്ചയാളുമായ ഗുരുജി ഗോള്വല്ക്കര്, ജനസംഘ സ്ഥാപകന് ഡോ. ശ്യാമപ്രസാദ് മുഖര്ജി, ഡോ. സമ്പൂര്ണാനന്ദ്, ഗാന്ധിയന് ധരംപാല് തുടങ്ങിയ പ്രേരണാപുരുഷന്മാര്ക്കാണ് ഓരോ വാല്യവും സമര്പ്പിച്ചിരിക്കുന്നത്.
ആര്എസ്എസ് സര്സംഘചാലക് ഡോ. മോഹന് ഭാഗവതിന്റേതാണ് അവതാരിക. ഭാരതീയ തത്വചിന്തയുടെ സംഗ്രഹമാണ് ഉപാധ്യായയുടെ ഏകാത്മ മാനവദര്ശനമെന്ന് മോഹന് ഭാഗവത് വിശദീകരിക്കുന്നു. മുതിര്ന്ന ആര്എസ്എസ് ചിന്തകനും പത്രപ്രവര്ത്തകനുമായ എം.ജി. വൈദ്യയുടെ സംഭാവനയും പുസ്തകത്തിലുണ്ട്.
കൂടുതല് ജലത്തിനും ഭൂമിക്കുംവേണ്ടിയുള്ള പാക്കിസ്ഥാന്റെ ആവശ്യത്തിന് ഭാരതം കീഴടങ്ങുന്നത് യുദ്ധതന്ത്രപരമായ പിഴവായിരിക്കുമെന്നും, ഈ രാജ്യങ്ങള് തമ്മിലുള്ള ഭാവിസംഘര്ഷങ്ങള്ക്ക് വിത്തുപാകലയിരിക്കുമെന്നും 1961 ല്തന്നെ ഉപാധ്യായ പറഞ്ഞത് പുസ്തകത്തിലുണ്ട്. ”വിദേശക്കൂറുള്ളവരെയും പാര്ട്ടികളെയും അതിര്ത്തിപ്രദേശങ്ങളില് പ്രവര്ത്തിക്കാന് അനുവദിക്കരുത്. പ്രശ്നബാധിത പ്രദേശങ്ങളിലെ ജനങ്ങളുടെ വിശ്വാസ്യത തകര്ക്കാന് കമ്യൂണിസ്റ്റ് പാര്ട്ടി, മുസ്ലിംലീഗ് പോലുള്ളവയെ അനുവദിക്കരുത്” എന്ന് പ്രവചനസ്വരത്തില് ഉപാധ്യായ പറയുന്നത് പുസ്തകത്തില് വായിക്കാം.
ഇന്നത്തെ പ്രകാശനചടങ്ങില് ആര്എസ്എസ് സര്കാര്യവാഹ് ഭയ്യാജി ജോഷി, ബിജെപി അധ്യക്ഷന് അമിത് ഷാ എന്നിവരും പങ്കെടുക്കും.
വാല്യം 1: (1940-1950) ആര്എസ്എസ്
പ്രചാരകനായിരിക്കെ എഴുതിയത്.
വാല്യം 2: (1951-1953) ജനസംഘ രൂപീകരണം, ആദ്യ
പൊതുതെരഞ്ഞെടുപ്പ്, ഒന്നാം പഞ്ചവത്സര പദ്ധതി.
വാല്യം 3: (1954-55) ഗോവവിമോചന പ്രക്ഷോഭം.
വാല്യം 4: (1956-1957) സംസ്ഥാന പുനഃസംഘടന
വാല്യം 5: (1956) സമ്പദ് വ്യവസ്ഥയെക്കുറിച്ച്
വാല്യം 6: രണ്ട് പദ്ധതികള്- വാഗ്ദാനങ്ങള്,
പ്രകടനം, പരിപ്രേഷ്യം.
വാല്യം 7: (1959) ടിബറ്റിലെ ചൈനയുടെ അധിനിവേശം
വാല്യം 8 : (1960) ഹമാര ദേശീയ ദര്ശന്- ലേഖനങ്ങള്,
എന്തുകൊണ്ട് ജനസംഘം?
വാല്യം 9 : (1961) രാഷ്ട്രീയപാര്ട്ടികള്ക്ക്
പെരുമാറ്റച്ചട്ടം
വാല്യം 10: (1962) ചൈനീസ് കടന്നാക്രമണം
വാല്യം 11: (1963-64) ഏകാത്മമാനവദര്ശനം
വാല്യം 12: (1965) കച്ച് ധാരണ, പാക്ക് ആക്രമണം,
താഷ്ക്കന്റ് കരാര്.
വാല്യം 13 (1966) സവര്ക്കറുടെ വിയോഗം,
ഗോസംരക്ഷണം.
വാല്യം 14 (1967-68) ഏകപാര്ട്ടി സ്വേഛാധിപത്യം
തകര്ക്കല്, ദീനദയാല് ജനസംഘം പ്രസിഡന്റ്,
കൊലപാതകം.
വാല്യം 15: വിവിധ ലേഖനങ്ങള്.
