മരട്: നെട്ടൂരില് പട്ടികവര്ഗ്ഗ വിഭാഗങ്ങള്ക്കായി നിര്മ്മിച്ചു നല്കിയ സാംസ്കാരിക നിലയം നോക്കുകുത്തിയാകുന്നു. ഉദ്ഘാടനം കഴിഞ്ഞ് ഒന്നര വര്ഷം പിന്നിടാറായിട്ടും വൈദ്യുതി ലഭിക്കാത്തതിനാല് കെട്ടിടം കാഴ്ചവസ്തു മാത്രമായി മാറിയിരിക്കുകയാണ്. നാളിതുവരെ കെട്ടിടനമ്പര് പോലും നല്കിയിട്ടില്ല. ഇതാണ് വൈദ്യുതി ലഭിക്കാതിരിക്കാന് കാരണമെന്ന് കോളനി നിവാസികള് പറഞ്ഞു.
രണ്ടു നിലകളിലായി നിര്മ്മിച്ചിരിക്കുന്ന കെട്ടിടത്തിന്റെ താഴത്തെ നിലയില് ഒരു ഹാളും, മുകളില് രണ്ടു മുറികളുമാണുളളത്. ഇതില് ഒന്ന് ലൈബ്രറിയാക്കണമെന്ന ആവശ്യം ഉയര്ന്നിരുന്നു. എന്നാല് വൈദ്യുതി ലഭിക്കാത്തതിനാല് അതും സാധ്യമല്ലെന്ന അവസ്ഥയാണ്. വെളളവും, വെളിച്ചവും ഇല്ലാത്ത കെട്ടിടം മറ്റാവശ്യങ്ങള്ക്കൊന്നും ഉപയോഗിക്കാന് കഴിയാത്ത സ്ഥിതിയിലാണെന്ന് കോളനി നിവാസികള് പറയുന്നു. കായല് തീരത്താണ് കെട്ടിടം നിര്മ്മിച്ചിരിക്കുന്നത്. തീരദേശ പരിപാലന നിയമം ലംഘിച്ചാണ് കെട്ടിടം നിര്മ്മിച്ചിരിക്കുന്നതെന്ന് നഗരസഭാധികൃതരും സമ്മതിക്കുന്നു. ഇക്കാരണത്താല് തന്നെ നിയമവിരുദ്ധമായി നിര്മ്മിച്ചിരിക്കുന്ന കെട്ടിടത്തിന് നമ്പര് നല്കിയാല് തങ്ങള് നടപടിക്കു വിധേയരാവും എന്നാണ് ഉദ്യോഗസ്ഥര് പറയുന്നത്.
എംപി ഫണ്ട് ഉപയോഗിച്ച് നിര്മ്മിച്ച കെട്ടിടത്തില് വെളളവും, വെളിച്ചവും ലഭ്യമാക്കാത്തത് പിന്നോക്ക വിഭാഗങ്ങളോടുളള അവഗണനയാണെന്നും കെട്ടിടനമ്പരും, വൈദ്യുതിയും എത്രയും വേഗം ലഭ്യമാക്കണമെന്നും ബിജെപി നെട്ടൂര് ഏരിയ കമ്മറ്റി ആവശ്യപ്പെട്ടു.
