പത്തനംതിട്ട: ലോക കായിക ഭൂപടത്തില് ജില്ലയെ എത്തിച്ച അഖിലാ അനിലിന് പത്തനംതിട്ടയുടെ ആദരം. ലോക ഫെന്സിംഗ് ചാമ്പ്യന്ഷിപ്പില് വെങ്കല മെഡല് നേടിയ അഖിലാ അനിലിന് ഹൃദ്യമായ സ്വീകരണവും അനുമോദനവും സംഘടിപ്പിച്ചു.
ആലുക്കാസ് ജുവലറി ജംഗ്ഷനില് നിന്നും ഓപ്പണ് ജീപ്പില് അഖിലാ അനിലിനെ വാദ്യമേളങ്ങളുടെയും കായികതാരങ്ങളുടെയും സാമൂഹ്യ, സാംസ്കാരിക, രാഷ്ട്രീയ, വ്യാപാര, മാദ്ധ്യമ പ്രവര്ത്തകരുടെ അകമ്പടിയോടെ സ്വീകരിച്ചു. മിനി സിവില് സ്റ്റേഷന് ജംഗ്ഷന്,പുതിയ ബസ് സ്റ്റാന്റ് വഴി ഘോഷയാത്ര പഴയ കെഎസ്ആര്ടിസി ജംഗ്ഷന് സമീപം സമാപിച്ചു. തുടര്ന്ന് ഗീതാജ്ഞലി ആഡിറ്റോറിയത്തില് നടന്ന അനുമോദന സമ്മേളനം ആന്റോ ആന്റണി എംപി ഉദ്ഘാടനം ചെയ്തു. സംഘാടക സമിതി കണ്വീനര് സലിം പി. ചാക്കോ അദ്ധ്യക്ഷത വഹിച്ചു. അടൂര്പ്രകാശ് എംഎല്എ, എന്എസ്എസ് പ്രസിഡന്റ് പി.എന്.നരേന്ദ്രനാഥന്നായര്, എ.പത്മകുമാര്, ജോര്ജ്ജ് മാമന് കൊണ്ടൂര്, സിനിമാനടന് ശരത്, ആര്.സനല്കുമാര്, പി.ജെ.അജയകുമാര്, കെ.ജി.പ്രകാശ്, രജനി പ്രദീപ്, ജെറി ഈശോ ഉമ്മന്, സാം ചെമ്പകത്തില്, റോബിന്പീറ്റര്, എം.ബി.ശ്രീകുമാര്, തുടങ്ങിയവര് പ്രസംഗിച്ചു.
