ചങ്ങനാശേരി: രോഗങ്ങളെ ജീവിത ശൈലിയിലൂടെ പ്രതിരോധിക്കാന് സമൂഹത്തിനാകണമെന്ന് എന്എസ്എസ് ജനറല് സെക്രട്ടറി ജി. സുകുമാരന്നായര്. മാനവ വിഭവശേഷി വകുപ്പിന്റെ ചുമതലയില് നായര് സര്വ്വീസ് സൊസൈറ്റി നടപ്പിലാക്കുന്ന ജീവിതശൈലിരോഗങ്ങളെ നിയന്ത്രിക്കാനുളള ”നമ്മുടെ ആരോഗ്യം” പദ്ധതിയുടെ സംസ്ഥാനതല ഉദ്ഘാടനം നിര്വ്വഹിക്കുകയായിരുന്നു അദ്ദേഹം. പദ്ധതി കൈപ്പുസ്തകമായ ”നമ്മുടെ ആരോഗ്യം” പ്രസിഡന്റ് അഡ്വ: പി.എന്. നരേന്ദ്രനാഥന് നായര്ക്ക് നല്കി ജനറല് സെക്രട്ടറി പ്രകാശനം ചെയ്തു.
അഡ്വ: പി.എന്. നരേന്ദ്രനാഥന്നായര് അദ്ധ്യക്ഷത വഹിച്ചു. ട്രഷറര് ഡോ: എം. ശശികുമാര്, വൈസ് പ്രസിഡന്റ് പ്രൊഫ: വി.പി. ഹരിദാസ്, ഹ്യൂമന് റിസോഴ്സസ് സെക്രട്ടറി കെ.ആര്. രാജന് എന്നിവര് സംസാരിച്ചു. ഡോ: ബി. പത്മകുമാര്, വിദഗ്ധ ഫാക്കല്റ്റി അംഗങ്ങള്ക്കുളള ഏകദിന പരിശീലനക്ലാസ്സിന് നേതൃത്വം നല്കി. ഡോക്ടര്മാരുള്പ്പെടുന്ന 300 വിദഗ്ധാംഗങ്ങളാണ് പദ്ധതിക്കുവേണ്ടി സംസ്ഥാനത്ത് സജ്ജരായിട്ടുള്ളത്.
കരയോഗതലത്തില് ബോധവത്ക്കരണ ക്ലാസ്സുകള്, രോഗനിര്ണ്ണയ ക്യാമ്പുകള്, ആരോഗ്യക്ലാസ്സുകള്, വ്യായാമം, ഭക്ഷണരീതികള്, ലഹരിമോചന പരിശീലനം, യോഗ, ധ്യാനം, ജൈവകൃഷി, പരിസ്ഥിതിസംരക്ഷണം, മാലിന്യനിര്മ്മാര്ജ്ജനം, മെഡിക്കല് ക്യാമ്പുകള് എന്നിവ നടത്തുന്നതിനാണ് ആദ്യഘട്ടത്തില് ലക്ഷ്യമിടുന്നത്. പദ്ധതിയുടെ നോഡല് ഓഫീസറായി ഡോ. ബി. പത്മകുമാറിനെ നിയോഗിച്ചു. 2018 ഒക്ടോബര് വരെയാണ് ആദ്യഘട്ടം.
