ആലപ്പുഴ: സിപിഎം സ്വീകരിച്ച തീരുമാനങ്ങള് ഇടതുസര്ക്കാരിന്റെ ശോഭ കെടുത്തിയെന്ന് എഐവൈഎഫ് ജില്ലാ സമ്മേളനത്തില് വിമര്ശനം. ഇന്നലെ ആരംഭിച്ച ഗ്രൂപ്പ് ചര്ച്ചയിലാണ് സിപിഎമ്മിനെതിരെ രൂക്ഷവിമര്ശനം ഉയര്ന്നത്. ഒട്ടേറെ കുറ്റവാളികളെ നിയമത്തിന്റെ ഊരാക്കുരുക്കില് നിന്നും ഊരിയെടുത്ത എം.കെ. ദാമോദരനെ പോലെയുള്ള ഒരു ക്രിമിനല് അഭിഭാഷകനെ ഉപദേഷ്ടാവാക്കാനുള്ള സര്ക്കാര് തീരുമാനം ഒഴിവാക്കേണ്ടതായിരുന്നു. കെ.എം. മാണിയെപ്പോലെയുള്ള അഴിമതിക്കാരെ സംരക്ഷിക്കുവാന് എം.കെ. ദാമോദരന് രംഗത്ത് വന്നതും വിസ്മരിക്കരുത്. അതിരപ്പള്ളി പദ്ധതി തിടുക്കത്തില് നടപ്പാക്കാനുള്ള വൈദ്യുതി മന്ത്രി കടകംപള്ളി സുരേന്ദ്രന്റെ നീക്കത്തിന് പിന്നിലും ദുരൂഹതയുണ്ട്. ഇതിന് പിന്നില് കോടികളുടെ അഴിമതിയാണ് ചില സിപിഎം നേതാക്കള് ലക്ഷ്യമിടുന്നത്.
മാദ്ധ്യമ പ്രവര്ത്തകര്ക്ക് നേരെ അഭിഭാഷകര് കേരളത്തിലെമ്പാടും ആക്രമം അഴിച്ചുവിടുമ്പോഴും സര്ക്കാര് വിഷയം പരിഹരിക്കാതെ മൗനം അവലംബിക്കുന്നതില് ദുരൂഹതയുണ്ട്. എം.കെ. ദാമോദരന്റെ നിര്ദ്ദേശപ്രകാരം ചില അഭിഭാഷകരുടെ പിന്തുണയോടെയാണ് കേരളത്തിലെമ്പാടും ആക്രമം അഴിച്ചുവിട്ടതെന്നും ആക്ഷേപമുണ്ട്. ഇതിനെ ശരിവെയ്ക്കുന്നതാണ് ഈ വിഷയത്തില് സര്ക്കാര് അവലംബിക്കുന്ന മൗനമെന്നും ഗ്രൂപ്പ് ചര്ച്ചയില് പ്രതിനിധികള് പറഞ്ഞു. കെ.എം. മാണിയെ ഇടതുപക്ഷ ജനാധിപത്യ മുന്നണിയില് എടുക്കുവാനായിരുന്നു ഒരുവിഭാഗം സിപിഎം നേതാക്കളുടെ ശ്രമം.
രാഷ്ട്രീയ പാര്ട്ടികളുടെ കൂട്ടായ്മയേക്കാളുപരി ജനങ്ങള് എടുക്കുന്ന തീരുമാനമാണ് തെരഞ്ഞെടുപ്പുകളില് വിജയകള് സമ്മാനിക്കുന്നതെന്ന തിരിച്ചറിവ് സിപിഎം നേതൃത്വത്തിന് ഉണ്ടാകണമെന്നും പ്രതിനിധികള് പറഞ്ഞു. ഈ വിഷയത്തിന്മേലുള്ള പൊതുചര്ച്ച ഇന്ന് നടക്കും.
