കണ്ണൂര്: വിവിധ സര്ക്കാര് സ്ഥാപനങ്ങളില് വ്യത്യസ്ത വിഭാഗങ്ങളില്പ്പെട്ട 800ലേറെ ഒഴിവുകള് ഉള്ളതായി ജില്ലാ പ്ലാനിംഗ് ഓഫീസ് ജില്ലാ വികസന സമിതിയെ യോഗത്തെ അറിയിച്ചു. കഴിഞ്ഞ യോഗങ്ങളില് എംഎല്എമാര് ആവശ്യപ്പെട്ടതിനെത്തുടര്ന്നാണ് ജില്ലയിലെ സ്ഥാപനമേധാവികള് പ്ലാനിംഗ് ഓഫീസില് ഒഴിവുകള് റിപ്പോര്ട്ട് ചെയ്തത്. ഇതില് 215 ഒഴിവുകളുമായി ജില്ലാ മെഡിക്കല് ഓഫീസ് (ആരോഗ്യം) ആണ് ഏറ്റവും മുന്നില്. 107 ഒഴിവുകളുള്ള കേരള വാട്ടര് അതോറിറ്റിയാണ് രണ്ടാം സ്ഥാനത്ത്. തദ്ദേശ സ്വയംഭരണ സ്ഥാപനങ്ങള് (86), എ.ഡി.സി ഓഫീസ് (49), മൈനര് ഇരിഗേഷന് (43), പഴശ്ശി ജലസേചന പദ്ധതി (40), പി.ഡബ്ല്യു.ഡി റോഡ്സ്- ബ്രിഡ്ജസ് വിഭാഗം (38), ദേശീയപാതാ വിഭാഗം (30), ദാരിദ്ര്യ നിര്മാര്ജന യൂനിറ്റ് (33), മൃഗസംരക്ഷണ വകുപ്പ് (30) എന്നിവയാണ് കൂടുതല് ഒഴിവുകള് റിപ്പോര്ട്ട് ചെയ്ത മറ്റു ഓഫീസുകള്.
ഇവയില് ജില്ലാ മെഡിക്കല് ഓഫീസ്, എഡിസി ഓഫീസ്, ദാരിദ്ര്യ നിര്മാര്ജന യൂനിറ്റ്, മൃഗസംരക്ഷണ വകുപ്പ്, ഡെപ്യൂട്ടി എക്സൈസ് കമ്മീഷണര് ഓഫീസ് (7), സപ്ലൈകോ തലശ്ശേരി (3), പട്ടികജാതി വികസന വകുപ്പ് (9), ആര്ടിഒ (2), ജില്ലാ മെഡിക്കല് ഓഫീസ്- ഐഎസ്എം(7), ഫിഷറീസ് (14) എന്നിവിടങ്ങളിലെ ഒഴിവുകള് പൂര്ണമായോ ഭാഗികമായോ പിഎസ്സിക്ക് റിപ്പോര്ട്ട് ചെയ്തിട്ടുണ്ട്. ചില ഓഫീസുകള് നിയമനാധികാരികളായ ഉയര്ന്ന ഓഫീസര്മാര്ക്ക് വിവരം കൈമാറിയിട്ടുള്ളതായും ജില്ലാ വികസന സമിതിയെ അറിയിച്ചു.
