മാനന്തവാടി : സെപ്തംബര്23 മുതല് 25 വരെ കോഴിക്കോട് നടക്കുന്ന ഭാരതീയ ജനതാ പാര്ട്ടി നാഷണല് കൗണ്സിലിന്റെ പൊതുസമ്മേളനത്തില് ജില്ലയില് നിന്നും ഇരുപതിനായിരത്തിലധികം പ്രവര്ത്തകര് പങ്കെടുക്കും. 24നാണ് പൊതുസമ്മേളനം നടക്കുക.
പരിപാടിയുടെ മുന്നോടിയായുള്ള ജ്യോതിപ്രയാണം വീര കേരളവര്മ്മ പഴശ്ശിരാജ അന്ത്യവിശ്രമം കൊള്ളുന്ന മാനന്തവാടിയിലെ ബലികുടീരത്തില്നിന്നാണ് ആരംഭിച്ചത്. ദേശീയ കൗണ്സിലില് ലോക്സഭാ, രാജ്യസഭാ എംപിമാര്, കേന്ദ്ര മന്ത്രിമാര്, ബിജെപി ഭരിക്കുന്ന സംസ്ഥാനങ്ങളിലെ മന്ത്രിമാര്, നഗരസഭാ അദ്ധ്യക്ഷന്മാര്, സംസ്ഥാനങ്ങളുടെ ഭാരവാഹികള് തുടങ്ങിയവരാണ് പങ്കെടുക്കുക.
22ന് രാവിലെ കരിപ്പൂരിലെത്തിയ അമിത്ഷാക്ക് പാര്ട്ടി പ്രവര്ത്തകര് പ്രൗഢഗംഭീര സ്വീകരണം നല്കി. ഇന്ന് രാവിലെ ഒന്പത് മണിക്ക് കടവ് റിസോര്ട്ടില് അദ്ദേഹം സംസാരിക്കും. 24ന് 3.30 ഓടെ പ്രധാനമന്ത്രി നരേന്ദ്രമോദി കോഴിക്കോടെത്തും. കടപ്പുറത്ത് സ്വപ്നനഗരിയില് നടക്കുന്ന പൊതുസമ്മേളനത്തിനുപുറമെ രാത്രി 7.30ന് സാമൂതിരി സ്കൂളില് നടക്കുന്ന സ്മൃതിസന്ധ്യയിലും അദ്ദേഹം പങ്കെടുക്കും. ജനസംഘം പ്രവര്ത്തകര്, അടിയന്തിരാവസ്ഥാ പീഡിതര്, അക്കാലത്തെ മാധ്യമപ്രവര്ത്തകര്, നിയമപാലകര് തുടങ്ങിയവരാണ് പരിപാടിയില് പങ്കെടുക്കുക.
23, 24, 25 തിയതികളില് വ്യത്യസ്ത പത്രസമ്മേളനങ്ങളും ഒരുക്കിയിട്ടുണ്ട്. നാഷണല് കൗണ്സിലിന്റെ ഭാഗമായി മലബാര് ക്രിസ്ത്യന് കോളേജിലും കടപ്പുറത്തെ സ്വപ്നനഗരിയിലും പ്രദര്ശനങ്ങള് നടക്കും.
