കാണ്പൂരിലെ പിച്ചിനു മുന്നില് ക്യുറേറ്റര് ശിവകുമാര്
കാണ്പൂര്: ഇന്ത്യന് ക്രിക്കറ്റിന്റെ ചരിത്രത്തിലേക്ക് വാതില്തുറക്കുകയാണ് ഇന്ന് കാണ്പൂര്. 500 ടെസ്റ്റ് എന്ന മോഹന നേട്ടത്തിലേക്ക് വിരാട് കോഹ്ലിയുടെ ഇന്ത്യ പാഡണിയുമ്പോള് എതിരാളികള് കെയ്ന് വില്യംസണിന്റെ ന്യൂസിലന്ഡ്. ഇംഗ്ലണ്ടിനും ഓസ്ട്രേലിയയ്ക്കും, വെസ്റ്റിന്ഡീസിനും ശേഷം അഞ്ഞൂറാം ടെസ്റ്റിനൊരുങ്ങുന്ന ആദ്യ രാജ്യമാകുന്നു ഭാരതം.
അഞ്ഞൂറിനപ്പുറം പ്രാധാന്യമുണ്ട് ന്യൂസിലന്ഡിനെതിരായ നാലു ടെസ്റ്റ് പരമ്പരയിലെ ആദ്യ ടെസ്റ്റിന്. റാങ്കിങ്ങിലെ ഒന്നാം സ്ഥാനം അരക്കിട്ടുറപ്പിക്കാന് 13 ടെസ്റ്റുകളാണ് ഈ സീസണില് നാട്ടില് ഇന്ത്യ കളിക്കുക. അതിന്റെ തുടക്കമാണിന്ന്. ഇംഗ്ലണ്ട്, ഓസ്ട്രേലിയ, ബംഗ്ലാദേശ് ടീമുകളാണ് പിന്നാലെയെത്തുക.
ടെസ്റ്റ് ക്രിക്കറ്റില് മികവിന്റെ പടി കയറുന്ന ഇന്ത്യ ഏറെ പ്രതീക്ഷയില്. നായകന് വിരാടിന്റെ ആക്രണോത്സുകതയും നാട്ടില് കളിക്കുന്നതിന്റെ ആനുകൂല്യവും പ്ലസ്. അനില് കുംബ്ലെയെന്ന ഇതിഹാസം പരിശീലകനായുള്ളപ്പോള് പ്രത്യേകിച്ച്. അഞ്ചു വീതം ബൗളര്മാരും ബാറ്റ്സ്മാന്മാരും ഒരു വിക്കറ്റ് കീപ്പറുമെന്ന ആക്രമണോത്സുക സമീപനമാകും വിരാടിന്റേത്. പിച്ച് സ്പിന്നിനെ അനുകൂലിക്കുമെന്നതിനാല് മൂന്നു സ്പിന്നര്മാര് കളിക്കും.
ആര്. അശ്വിന്, അമിത് മിശ്ര, രവീന്ദ്ര ജഡേജ. ഇഷാന്ത് ശര്മയില്ലാത്തതിനാല് ഭുവനേശ്വര് കുമാര്, ഉമേഷ് യാദവ്, മുഹമ്മദ് ഷാമി എന്നിവരില് രണ്ടു പേരാകും ആദ്യ പതിനൊന്നില്. വിരാട്, ചേതേശ്വര് പൂജാര, അജിങ്ക്യ രഹാനെ ബാറ്റിങ് നിരയിലുണ്ടാകും. ഓപ്പണര്മാരായി മുരളി വിജയും, ശിഖര് ധവാനുമെത്തിയേക്കും. ഇവരിലൊരാള്ക്കു പകരം തകര്പ്പന് ഫോമിലുള്ള കെ.എല്. രാഹുലിനെ പരിഗണിക്കാനും സാധ്യത. അങ്ങനെയെങ്കില്, ധവാന് പുറത്തിരുന്നേക്കും. മധ്യനിരയില് രോഹിത് ശര്മയ്ക്കും ഇടം ലഭിക്കാനിടയില്ല. വിക്കറ്റിനു പിന്നില് വൃദ്ധിമാന് സാഹ.
ന്യൂസിലന്ഡിനെ കുറച്ചുകാണാനൊന്നും ആതിഥേയര് തയാറല്ല. ഐപിഎല്ലില് കളിച്ച നിരവധി താരങ്ങളുള്ളതിനാല് പ്രത്യേകിച്ച്. മുംബൈയ്ക്കെതിരായ സന്നാഹ മത്സരത്തില് നിലവാരം കുറഞ്ഞ സ്പിന്നര്മാരോട് പോലും പതറി കിവികള്. മിച്ചല് സാന്റ്നര് എന്ന സ്പിന്നറാണ് ഇന്ത്യയിലെ വേഗം കുറഞ്ഞ വിക്കറ്റുകളില് ന്യൂസിലന്ഡിന്റെ പ്രതീക്ഷ. ബാറ്റിങ്ങില് മാര്ട്ടിന് ഗുപ്ടില്, കെയ്ന് വില്യംസണ്, റോസ് ടെയ്ലര് എന്നിവരുടെ പരിചയസമ്പത്ത് തുണയ്ക്കും. ഉപഭൂഖണ്ഡത്തിലെ പിച്ചുകളില് നന്നായി ബാറ്റ് ചെയ്യാന് കഴിയുന്ന റോസ് ടെയ്ലര്ക്ക് പ്രത്യേകിച്ച്. ഇന്ത്യന് വംശജനായ ഓള്റൗണ്ടര് ഇഷ് സോധി, പേസര് ട്രെന്റ് ബൗള്ട്ട് എന്നിവരും ഇന്ത്യയ്ക്ക് ഭീഷണിയായേക്കും.
ആദ്യ ദിവസം മുതല് തന്നെ കുഴഞ്ഞുമറിയുമെന്നൊരു ദുഷ്പേരുണ്ട് കാണ്പൂരിലെ കളിത്തട്ടിന്. എന്നാല്, ഇത്തവണ മാറ്റമുണ്ടാകുമെന്നാണ് സൂചന. പിച്ചിന്റെ ബലത്തില് കളി ജയിക്കുന്നതിനോട് താത്പര്യമില്ലെന്ന് പരിശീലകന് അനില് കുംബ്ലെ പറഞ്ഞതും ചേര്ത്തു വായിക്കാം. അവസാന രണ്ടു ദിവസമാകും സ്പിന്നിനെ തുണയ്ക്കുക. റിവേഴ്സ് സ്വിങ്ങും പ്രതീക്ഷിക്കുന്നു.
മികച്ച മത്സരമാണ് പ്രതീക്ഷിക്കുന്നതെന്ന് ഇന്ത്യന് നായകന് വിരാട് കോഹ്ലി പറഞ്ഞു. എതിരാളികള് കരുത്തരാണ്. മികച്ച താരങ്ങളും അവര്ക്കുണ്ട്. എങ്കിലും ഞങ്ങളുടെ ശക്തിയെക്കുറിച്ച് നല്ല ബോധ്യമുണ്ട്- വിരാട് പറഞ്ഞു.
ഇതുവരെ രണ്ടു ടെസ്റ്റ് മാത്രമേ ഇവിടെ ജയിച്ചിട്ടുള്ളൂയെന്നത് ഓര്മയിലുണ്ടെന്ന് ന്യൂസിലന്ഡ് പരിശീലകന് മൈക്ക് ഹെസന്. സമീപകാലത്ത് ഇന്ത്യ, മികച്ച ക്രിക്കറ്റാണ് കളിക്കുന്നത്. എന്നാല്, തങ്ങള്ക്കൊപ്പം മികച്ച താരങ്ങളുണ്ടെന്നും അദ്ദേഹം പറഞ്ഞു.
