ബിജെപി കേന്ദ്രസംഘം പിണറായിയില് സിപിഎം അക്രമത്തിനിരയായ നവജിത്തിനെ സന്ദര്ശിച്ചപ്പോള്
കണ്ണൂര്: ചന്ദ്രേട്ടനെ കൊല്ലരുതെന്ന് ഞാനും മക്കളും അവരുടെ കാലുപിടിച്ച് കരഞ്ഞപേക്ഷിച്ചിരുന്നു. പക്ഷേ ഞങ്ങളുടെ കണ്മുന്നിലിട്ടാ അവര് ചന്ദ്രേട്ടനെ… നന്ദന് ഞങ്ങളെ അറിയാമായിരുന്നില്ലെ… എന്നിട്ടുമെന്തിനാ അവര്… അന്നൂരില് സിപിഎമ്മുകാര് വീട്ടില്ക്കയറി വെട്ടിക്കൊലപ്പെടുത്തിയ ബിഎംഎസ് മേഖലാ സെക്രട്ടറി സി.കെ.രാമചന്ദ്രന്റെ വീട്ടിലെത്തിയ ബിജെപി കേന്ദ്രസംഘത്തിന് മുന്നില് ഭാര്യ രജനിയുടെ കരഞ്ഞുകൊണ്ടുള്ള സംസാരത്തില് നേതാക്കളുടെയും പ്രവര്ത്തകരുടെയും കണ്ണുകള് നിറഞ്ഞു. ഇക്കഴിഞ്ഞ ജൂലൈ 11 നാണ് രാമചന്ദ്രനെ സിപിഎമ്മുകാര് ഭാര്യയുടെയും മക്കളുടെയും മുന്നിലിട്ട് കഴുത്തറുത്ത് കൊന്നത്. ബിജെപി ദേശീയ അധ്യക്ഷന് അമിത് ഷായുടെ നിര്ദ്ദേശ പ്രകാരമാണ് എംപിമാരായ ഭൂപേന്ദ്ര യാദവ്, നളിന്കുമാര് കട്ടീല്, അനന്തകുമാര് ഹെഗ്ഡെ, ബിജെപി ദേശീയ സെക്രട്ടറി എച്ച്.രാജ എന്നിവരുടെ നേതൃത്വത്തിലുള്ള സംഘം കണ്ണൂര് ജില്ലയില് സിപിഎം അക്രമത്തില് കൊല്ലപ്പെട്ടവരുടെയും പരിക്ക് പറ്റിയവരുടെയും വീടുകള് സന്ദര്ശിച്ചത്. ജൂലൈ 11 ന് സിപിഎം ക്രിമിനല് സംഘങ്ങള് അന്നൂരിലും പരിസര പ്രദേശങ്ങളിലും നടത്തിയ ആസൂത്രിത അക്രമത്തില് നിരവധി വീടുകളും, വാഹനങ്ങളും, സ്കൂളുകളും സ്ഥാപനങ്ങളും തകര്ത്തിരുന്നു. ഞെട്ടിക്കുന്ന അനുഭവങ്ങളാണ് കേന്ദ്രസംഘത്തിന് മുന്നില് കുടുംബാംഗങ്ങള് നിരത്തിയത്.
പയ്യന്നൂരില് സിപിഎം സംഘം കൊലപ്പെടുത്തിയ വിനോദ് കുമാറിന്റെ അമ്മയുടെ കണ്ണീര് ഇതുവരെയും തോര്ന്നിട്ടില്ല. സിപിഎം സംഘത്തിന്റെ ഭീഷണി ഇപ്പോഴുമുണ്ട്. മകന്റെ കൊലയാളികള്ക്ക് പരമാവധി ശിക്ഷ കൊടുക്കാന് ആവശ്യമായ സഹായം വേണമെന്നാണ് വിനോദ് കുമാറിന്റെ അച്ഛനും അമ്മയും ആവശ്യപ്പെട്ടത്. പാപ്പിനിശ്ശേരിയില് സിപിഎമ്മുകാര് വീട്ടില്ക്കയറി അടിച്ചുകൊന്ന സുജിത്തിന്റെ അമ്മയും ഇപ്പോഴും മകന്റെ മരണത്തിന്റെ ആഘാതത്തില് നിന്ന് മോചിതയായിട്ടില്ല. കുടുംബാംഗങ്ങള് നോക്കി നില്ക്കെയാണ് സുജിത്തിനെ തല്ലിക്കൊന്നത്.
സിപിഎം സംഘം ഇരുകാലുകളും അടിച്ചുതകര്ത്ത മാത്തില് സ്വദേശി രതീഷ് പൂര്ണ്ണമായും സുഖം പ്രാപിക്കാത്ത കാലുകളുമായാണ് ഇപ്പോഴും ജീവിക്കുന്നത്. 2011 ആഗസ്റ്റ് 31 ന് രാവിലെ ജോലിക്ക് പോകുമ്പോഴാണ് രതീഷിനെ സിപിഎം സംഘം അക്രമിച്ചത്. വിഷം പുരട്ടിയ വാളുകളുപയോഗിച്ച് വെട്ടിയതിനാല് രതീഷ് ഇപ്പോഴും പൂര്ണ്ണമായും സുഖം പ്രാപിച്ചിട്ടില്ല. ഇതേ അവസ്ഥ തന്നെയാണ് പെരിങ്ങോത്തെ പ്രസന്നന്റെതും. ഓട്ടോ ഡ്രൈവറായ പ്രസന്നനെ യാത്രക്കാരെന്ന വ്യാജേന ഓട്ടം വിളിച്ച് കൊണ്ടുപോയി ആളൊഴിഞ്ഞ സ്ഥലത്ത് വെച്ച് അക്രമിക്കുകയായിരുന്നു. ഇരുവരെയും നേരില്ക്കണ്ട സംഘം ആവശ്യമായ സഹായങ്ങള് ഒരുക്കാമെന്ന ഉറപ്പ് നല്കി.
ബിജെപി സംസ്ഥാന അധ്യക്ഷന് കുമ്മനം രാജശേഖരന്, സംസ്ഥാന സെക്രട്ടറി വി.കെ.സജീവന്, ജില്ലാ അധ്യക്ഷന് പി.സത്യപ്രകാശ്, ദേശീയ സമിതി അംഗം പി.കെ.വേലായുധന്, മേഖലാ വൈസ് പ്രസിഡണ്ട് എ.പി.ഗംഗാധരന്, സംസ്ഥാന സെല് കോ-ഓഡിനേറ്റര് കെ.രഞ്ജിത്ത്, യുവമോര്ച്ച സംസ്ഥാന ഉപാധ്യക്ഷന് ബിജു ഏളക്കുഴി, കെ.കെ.ചന്ദ്രന്, എ.ഒ.രാമചന്ദ്രന്, എന്.ഹരിദാസന്, ആനിയമ്മ രാജേന്ദ്രന്, എന്.രതി, വി.പി.സുരേന്ദ്രന്, വി.ശശിധരന്, അഡ്വ. വി.രത്നാകരന്, കെ.കെ.വിനോദ് കുമാര്, പി.എ.റിത്തേഷ് തുടങ്ങിയവരും സംഘത്തോടൊപ്പമുണ്ടായിരുന്നു.
ബിജെപി കേന്ദ്രസംഘം ഇരിട്ടി തില്ലങ്കേരിയിലും പിണറായിയിലും സന്ദര്ശനം നടത്തി.
