മുംബൈ: ഭാരതത്തില് വാടക ഗര്ഭധാരണത്തിലൂടെ ജനിച്ച കുഞ്ഞിന് ബ്രിട്ടനിലേക്ക് പാസ്പോര്ട്ട് അനുവദിക്കാത്ത ബ്രിട്ടീഷ് എംബസിക്കെതിരെ വിദേശകാര്യ മന്ത്രി സുഷമ സ്വരാജ്. ബ്രിട്ടീഷ് ദമ്പതികളുടെ സ്ഥിതി അറിഞ്ഞ സുഷമ ട്വിറ്ററിലൂടെ പ്രതിഷേധം അറിയിക്കുകയായിരുന്നു.
‘വാടക ഗര്ഭധാരണത്തിലൂടെ ജനിച്ച കുഞ്ഞിന് അഭയം അനാഥാലയമോ?’ സുഷമ ചോദിക്കുന്നു.
മെഡിക്കല് വിസയില് മുംബൈയിലെത്തിയ ബ്രിട്ടീഷ് ദമ്പതികള് ക്രിസ് ന്യൂമാനും മിഷേല് ന്യൂമാനും കുഞ്ഞിന് വിസ അപേക്ഷിച്ചെങ്കിലും ബ്രിട്ടീഷ് എംബസി നല്കിയില്ല. രേഖകള് പെട്ടെന്ന് നല്കാനാവില്ലെന്നാണ് വിശദീകരണം. ക്രിസിന്റെയും മിഷേലിന്റെയും വിസാകാലം ഒക്ടോബറില് തീരും.
വാടക ഗര്ഭധാരണത്തിന് ബ്രിട്ടനില് നിരോധനമാണ്. കുഞ്ഞിനു വേണ്ടിയാണ് ന്യൂമാന് ദമ്പതികള് ഭാരതത്തില് എത്തിയത്. ഭാരതത്തിലും വാടകഗര്ഭധാരണത്തിന് നിയന്ത്രണമേര്പ്പെടുത്തി. കഴിഞ്ഞമാസമായിരുന്നു തീരുമാനം. ഭാരതത്തിലെ സൗകര്യം അനുഭവിക്കുന്ന അവസാനത്തെ ദമ്പതികളും ഒരുപക്ഷേ ഇവരാകും.
പരിശോധനകള്ക്കും അന്വേഷണങ്ങള്ക്കും ശേഷം കുഞ്ഞിന് പാസ്പോര്ട്ട് അനുവദിക്കുമെന്നാണ് ബ്രിട്ടീഷ് ആഭ്യന്തര വകുപ്പ് അറിയിച്ചത്. കുട്ടിക്ക് ബ്രിട്ടീഷ് പൗരത്വത്തിനുള്ള അപേക്ഷയും പരിഗണയിലാണെന്നവര് പറയുന്നു. അതുവരെ കുഞ്ഞിനെ അനാഥാലയത്തിലാക്കേണ്ടി വരും. ഇതിന്റെ അടിസ്ഥാനത്തിലാണ് മന്ത്രി സുഷമയുടെ പ്രതിഷേധ പ്രതികരണം വന്നത്.
