കോഴിക്കോട്: ഭാരതീയ സംസ്‌കാരം ഇതര രാഷ്ട്രങ്ങള്ക്ക് മാതൃകയാണെന്ന് സംവിധായകന്‍ അലി അക്ബര്‍ പറഞ്ഞു. സേവാഭാരതി ബാലികാസദനത്തിലെ ഓണാഘോഷം ‘ഓണവിരുന്നില്‍’ മുഖ്യാതിഥിയായി സംസാരിക്കുകയായിരുന്നു അദ്ദേഹം. ഈശ്വരനെ മനസ്സിലേക്ക് പ്രവേശിപ്പിക്കണമെന്നും ഈശ്വരന്‍ സ്‌നേഹമാണെന്നും ഈ തത്ത്വം തന്നെയാണ് ഭഗവത്ഗീതയില്‍ ഉദ്‌ഘോഷിക്കുന്നതെന്നും അദ്ദേഹം പറഞ്ഞു.
നിലവിളക്ക് കത്തിക്കാനും ഈശ്വര പ്രാര്‍ത്ഥന ചൊല്ലാനും വിമുഖത കാണിക്കുന്നവര്‍ സമീപ ഭാവിയില്‍ ഹൈന്ദവസംസ്‌കാരത്തിന്റെ ഭാഗമായ നൃത്തവും മറ്റ് ആഘോഷങ്ങളും നിരോധിച്ചേക്കാമെന്നും കെ.സി. വിനയരാജ് അഭിപ്രായപ്പെട്ടു. ഇന്റര്‍നെറ്റ് സംസ്‌കാരം പലപ്പോഴും കുട്ടികളെ അയല്‍ക്കാരനെ മറക്കാനുള്ള ഉപാധിയായി മാറിയിട്ടുണ്ടെന്നും വിദേശ രാഷ്‌ട്രങ്ങളിലെ ഫ്രെന്‍ഡ്ഷിപ്പ് സംസ്‌കാരം സ്ഥാപിക്കാനുള്ള ഏക ഉപകരണമായിട്ടുണ്ടെന്നും അദ്ദേഹം കൂട്ടിച്ചേര്‍ത്തു.
ഓണാഘോഷം പറമ്പിടി ഇല്ലം മോഹനന്‍ നമ്പൂതിരി ഉദ്ഘാടനം ചെയ്തു. സനാതനധര്‍മ്മത്തില്‍ ഊന്നിയുള്ള പ്രവര്‍ത്തനമാണ് സേവാഭാരതി ചെയ്യുന്നതെന്നും അര്‍പ്പ ണ ബുദ്ധിയോടെ ചെയ്യുന്ന പ്രാര്‍ത്ഥന കുട്ടികളില്‍ വലിയ മാറ്റങ്ങള്‍ വരുത്തുമെന്നും അദ്ദേഹം പറഞ്ഞു. ബാലികാസദനം പ്രസിഡന്റ് ടി. സുബ്രഹ്മണ്യന്‍ മാസ്റ്റര്‍ അധ്യക്ഷത വഹിച്ചു.പാലക്കാട് നഗരസഭാ ചെയര്‍മാന്‍ സി. കൃഷ്ണകുമാര്‍, എ.ബജിന്ദ്, സേവാഭാരതി ജില്ലാ ജനറല്‍ സെക്രട്ടറി എം.സി. ഷാജുകുമാര്‍, ബാലികാസദനം ജോ-സെക്രട്ടറി രജനീഷ് സുരേഷ്, ഡോ. അഞ്ജലി ധനഞ്ജയന്‍ എന്നിവര്‍ സംസാരിച്ചു.
