പയ്യാവൂര്: പൊന്നുരുകും പൂക്കാലം.. നിന്നെ കാണാന് വന്നൂ… സഹോദരി ഭാവന വേദിയില് ഗാനമായി പെയ്തിറങ്ങുമ്പോള് ബിജിന്റെ വിരലുകള് മൃദംഗതാളത്തില് തിമിര്ക്കുകയണ്. ഷാര്ജ ഔവര് ഓണ് ഇംഗ്ലീഷ് മീഡിയം സ്കൂളിലെ ഏഴാം ക്ലാസ് വിദ്യാര്ത്ഥികളാണ് ഈ സംഗീത കലാകാരന്മാര്.
കണ്ണൂര് പുതിയതെരുവിലെ പുത്തരിക്കല് ബാബു-പയ്യാവൂര് സ്വദശിനി മേലേടത്ത് ബിന്ദു ദമ്പതികളുടെ ഇരട്ടക്കുട്ടികളാണിവര്. ഭാവന നാലാം വയസ്സുമുതല് സംഗീതവും നൃത്തവും പഠിക്കുന്നു. കലാമണ്ഡലം മിനി രാധാകൃഷ്ണന്റെ ശിക്ഷണത്തില് നൃത്തവും പ്രയേഷ് കാഞ്ഞങ്ങാടിന്റെ മേല്നോട്ടത്തില് സംഗീതവും കലാചാര്യ കൃഷ്ണമണി മാരാറിന്റെ ശിക്ഷണത്തില് സോപാനസംഗീതവും പഠിക്കുന്നു. യുഎഇയിലെ സ്കൂള് കലോത്സവങ്ങളില് നിരവധി സമ്മാനങ്ങള് വാരിക്കൂട്ടിയ ഈ കലാകാരിയെത്തേടി 2016 ലെ മാര്ഷ്വല് അവാര്ഡ് ഫോര് എക്സലന്സ് എത്തി.
പഠനത്തിനൊപ്പം വിദേശങ്ങളിലും സ്വദേശത്തും നിരവധി കച്ചേരികളിലും നൃത്തവേദികളിലും നിറസാന്നിധ്യമായി മാറുകയാണീ ഇരട്ടക്കുട്ടികള്. ഗാനഗന്ധര്വ്വന് യേശുദാസ്, വിജയ് യേശുദാസ്, നജീം അര്ഷാദ്, ഗായത്രി അശോക്, സിത്താര കൃഷ്ണകുമാര് എന്നിവരുടെ കൂടെ ഭാവന നിരവധി വേദികളില് പാടിയിട്ടുണ്ട്. പ്രശസ്ത സിനിമാ പിന്നണിഗായകന് കാഞ്ഞങ്ങാട് രാമചന്ദ്രന് പുറത്തിറക്കിയ പയ്യാവൂര് കിരാതമൂര്ത്തി ഭക്തിഗാനങ്ങളില് തുടങ്ങി നിരവധി ആല്ബങ്ങളില് ഭാവന പാടിയിട്ടുണ്ട്.
സഹോദരന് ബിജിന് മൃദംഗത്തിലും ഇടക്കയിലും മാത്രമല്ല പ്രതിഭ തെളിയിച്ചിട്ടുള്ളത്. കരാട്ടെയില് ബ്ലാക് ബെല്ട്ടും നേടിയിട്ടുണ്ട് ഈ കൊച്ചുകലാകാരന്. രണ്ടു വര്ഷം മുമ്പാണ് ദുബൈ കരാട്ടെ ഫെഡറേഷന് ബ്ലാക് ബെല്ട്ട് നല്കിയത്. പല കരാട്ടേ ടൂര്ണമെന്റുകളിലും ബിജിന് സമ്മാനങ്ങള് വാരിക്കൂട്ടിയിട്ടുണ്ട്. പയ്യാവൂര് ഗോപാലകൃഷ്ണമാരാരാണ് ബിജിനെ ഇടക്ക പരിശീലിപ്പിക്കുന്നത്.
ആ ഇരട്ടകളുടെ ഷാര്ജയിലെ മൈസലൂണിലെ വീട് എപ്പോഴും സംഗീതസാന്ദ്രമാണ്. പാട്ടിന്റെ ആ വീട്ടിലേക്ക് നിരവധി സംഗീതപ്രേമികളെത്താറുണ്ട്.
