ന്യുയോർക്ക്: ഭാരതത്തിന് സമുദ്ര നിരീക്ഷണത്തിന് വേണ്ടിയുള്ള 22 ഡ്രോണുകൾ അമേരിക്ക നൽകും. കഴിഞ്ഞ ജൂണിൽ അമേരിക്കയുടെ പ്രധാന പ്രതിരോധ പങ്കാളിയായി ഭാരതത്തിനെ അംഗികരിച്ചതിനു ശേഷമാണ് ഡ്രോണുകൾ ഭാരതത്തിന് ലഭിക്കുവാൻ പോകുന്നത്.
ഇന്ത്യൻ സമുദ്രത്തിലെ സ്വത്തു സംരക്ഷിക്കുക, മുംബൈ ഭീകരാക്രമണം നടത്തിയവർ കടലിലൂടെ രാജ്യത്തു നുഴഞ്ഞുകയറിയതു പോലുള്ള സാഹചര്യം ഒഴിവാക്കുന്നതിനു നിരീക്ഷണം നടത്തുക തുടങ്ങിയ ലക്ഷ്യങ്ങൾ മുന്നിൽ കണ്ടുകൊണ്ടാണ് ഭാരതം അത്യാധുനിക ഡ്രോണുകൾ കരസ്ഥമാക്കുന്നത്.
കഴിഞ്ഞ ഫെബ്രുവരിയിലാണ് ഈ ആവശ്യമുന്നയിച്ച് ഭാരതം യുഎസിനെ സമീപിക്കുന്നത്. ഇതു സംബന്ധിച്ച് അമേരിക്കയുടെ ഭാഗത്തുനിന്ന് ഔദ്യോഗിക അറിയിപ്പുകളൊന്നും ഉണ്ടായിട്ടില്ലെങ്കിലും ഭാരതത്തിന്റെ പ്രതിരോധമന്ത്രി മനോഹർ പരീക്കറും യുഎസ് പ്രതിരോധ സെക്രട്ടറി ആഷ്ടൺ കാർട്ടറും കഴിഞ്ഞ മാസം 29ന് ഇതു സംബന്ധിച്ചു വിശദമായ ചർച്ചകൾ നടത്തിയിരുന്നു.
