കണ്ണൂര്: കണ്ണൂര് നഗരത്തെ ഭക്തിലഹരിയിലാറാടിച്ച് ഗണേശ വിഗ്രഹങ്ങള് പയ്യാമ്പലം കടപ്പുറത്ത് നിമഞ്ജനം ചെയ്തു. കണ്ണൂര് നഗരത്തെ അക്ഷരാര്ത്ഥത്തില് വിഗ്നേശ്വര പ്രഭയിലാറാടിച്ച നിമഞ്ജന ഘോഷയാത്രയില് ആയിരങ്ങള് പങ്കെടുത്തു. ഓരോ പ്രദേശത്തും വ്രതശുദ്ധിയോടെ നടന്ന ഗണേശ വിഗ്രഹപൂജയില് പതിനായിരങ്ങളാണ് പങ്കാളികളായത്. വിവിധ ക്ഷേത്രങ്ങള്, മഠങ്ങള്, ഗ്രാമക്കൂട്ടായ്മകള് എന്നിവയുടെ നേതൃത്വത്തില് അറുപതോളം കേന്ദ്രങ്ങളില് നിന്ന് ഭക്ത്യാദരപൂര്വ്വം എഴുന്നള്ളിച്ച് കൊണ്ടുവന്ന ഗണേശ വിഗ്രഹ ഘോഷയാത്രകള് താളിക്കാവ് മൈതാനിയില് സംഗമിച്ചാണ് മഹാശോഭായാത്രയായി പയ്യാമ്പലത്തെത്തിച്ചത്. ഗണേശസേവാകേന്ദ്രത്തിന്റെ ആഭിമുഖ്യത്തില് നടന്ന നിമഞ്ജന ഘോഷയാത്ര അമൃതാനന്ദമയീമഠം മഠാധിപതി സ്വാമി അമൃത കൃപാനന്ദപുരി ഉദ്ഘാടനം ചെയ്തു. തുടര്ന്ന് ഹനുമാന് കോവില്, താളിക്കാവ് മാരിയമ്മന് കോവില്, താളിക്കാവ് ഭഗവതി ക്ഷേത്രം, മുനീശ്വരന് കോവില്, സ്റ്റേഷന് റോഡ്, ഫോര്ട്ട് റോഡ്, ബാങ്ക് റോഡ്, മാര്ക്കറ്റ്, മുത്തുമാരിയമ്മന് കോവില്, കൃഷ്ണന് കോവില്, കാമാക്ഷിയമ്മന് കോവില്, പിളളയാര്കോവില് എന്നീ ക്ഷേത്രങ്ങളിലെ സ്വീകരണത്തിനു ശേഷം നിമഞ്ജന ഘോഷയാത്ര ശ്രീനാരായണ പാര്ക്ക് വഴി പയ്യാമ്പലത്ത് എത്തിച്ചേര്ന്നു. പയ്യാമ്പലത്ത് നടന്ന സമാപന സംഗമത്തില് കെ.എന്.രാധാകൃഷ്ണന് മാസ്റ്റര് വിനായക ചതുര്ത്ഥി സന്ദേശം നല്കി. സ്വാമി അമൃത കൃപാനന്ദപുരി, സ്വാമിനി അപൂര്വ്വാനന്ദ സരസ്വതി, സ്വാമി സാധുവിനോദ്, കെ.ജി.ബാബു, ആര്.കെ.ഗിരിധരന്, രവീന്ദ്രനാഥ് ചേലേരി, ഭാഗ്യശീലന് ചാലാട്, പി.ആര്.രാജന്, കെ.കെ.വിനോദ്കുമാര്, എ.നാരായണന് മാസ്റ്റര് തുടങ്ങിയവര് നേതൃത്വം നല്കി.
