കാസര്കോട്: തെങ്ങോലയുടെ നഷ്ടപ്പെട്ട പ്രതാപം തിരികെ കൊണ്ടു വരുന്നതിനും കരകൗശല ഉല്പന്നങ്ങളും കളിക്കോപ്പുകളും അലങ്കാര വസ്തുക്കളും പുതിയ തലമുറയെ പരിചയപ്പെടുത്തുന്നതിനായി ശില്പശാലയും സെമിനാറും പ്രദര്ശനവും നടത്തുന്നു. സുവര്ണ ജൂബിലി ആഘോഷത്തിന്റെ ഭാഗമായി സിപിസിആര്ഐയും തൃക്കരിപ്പൂര് കേന്ദ്രമായി പ്രവര്ത്തിക്കുന്ന ഫോക് ലാന്ഡ് എന്ന അന്താരാഷ്ട്ര നാടന് കലാ പഠന കേന്ദ്രവും ഇന്ത്യന് നാഷണല് ട്രസ്റ്റ് ഫോണ് ആര്ട് ആന്ഡ് കള്ച്ചറല് ഹെറിട്ടേജും സംയുക്തമായാണ് ശില്പശാല സംഘടിപ്പിക്കുന്നത്.
ഇന്ന് രാവിലെ 11 മണിക്ക് പ്രശസ്ത ചിത്ര ചരിത്രകാരന് കെ.കെ.മാരാര് ശില്പശാല ഉദ്ഘാടനം ചെയ്യും. സിപിസിആര്ഐ ഡയറക്ടര് ഡോ.ചൗഡപ്പ ചടങ്ങില് അധ്യക്ഷത വഹിക്കും. കേരളത്തിലെ പ്രശസ്തരായ കലാകാരന്മാരെയും കരകൗശല വിദഗ്ദ്ധരെയും ഉള്പെടുത്തി ശില്പശാലയും ഫോക്ലോര് വിദഗ്ദ്ധരെയും ശാസ്ത്രജ്ഞന്മാരെയും ഈ രംഗത്തെ വിദഗ്ദ്ധരെയും ഉള്പെടുത്തി സെമിനാറും ഉല്പന്നങ്ങളുടെ പ്രദര്ശനവുമാണ് മൂന്നു ദിവസത്തെ പരിപാടിയില് ഉള്പെടുത്തിയിട്ടുള്ളത്.
ഗ്രാമീണ ജീവിതത്തിന്റെ തുടിപ്പുകളായ തെങ്ങോല കരകൗശല വസ്തുക്കളുടെ നിര്മ്മാണത്തില് പ്രഗത്ഭരായ കലാകാരന്മാര് അണിനിരക്കും. കുരുത്തോല വാടാതെ സംരക്ഷിക്കാനുള്ള സാങ്കേതിക വിദ്യയും പുതുതലമുറയ്ക്ക് കൈമാറുന്നതിന് സിപിസിആര്ഐയിലിലെ ശാസ്ത്രജ്ഞന്മാരുടെ പങ്കാളിത്തവും ശില്പശാലയ്ക്ക് മാറ്റുകൂട്ടുമെന്ന് സിപിസിആര്ഐ അധികൃതര് വാര്ത്താ സമ്മേളനത്തില് അറിയിച്ചു.
ശൈശവം മുതല് ശവദാഹം വരെയുള്ള ജീവിതത്തില് പലതരത്തില് മനുഷ്യ ജീവിതവുമായി തെങ്ങോലയ്ക്ക് ബന്ധമുണ്ട്. കുരുത്തോല മുതല് ഉണങ്ങിയ ഓല വരെ തെങ്ങോലയുടെ വിവിധ ദശകള് ഉപയോഗിച്ചു വരുന്നുണ്ട്. കളിക്കോപ്പുകള് മുതല് അനുഷ്ഠാനങ്ങള് വരെ നീളുന്നതാണ് തെങ്ങോലയുടെ ആവശ്യങ്ങള്. പാര്പ്പിട നിര്മ്മാണത്തിനും ഇന്ധന ആവശ്യങ്ങള്ക്കുമുള്ള ഗ്രാമീണ ജീവിതത്തിന്റെ തെങ്ങോലയോടുള്ള ആശ്രിതത്വം പുതിയ തലമുറ മറന്നുകഴിഞ്ഞിരിക്കുകയാണ്. ഭൂമിക്ക് ഭീഷണിയാവുന്ന പ്ലാസ്റ്റിക് ഉള്പെടെയുള്ള വസ്തുക്കള് തെങ്ങോലയ്ക്ക് പകരമായി ജീവിതത്തില് കടന്നു വരുന്നു. ജീവനും ആരോഗ്യത്തിനും ഹാനികരമായ ഇത്തരം പ്രവണതകളെ ചെറുക്കുന്നതിന് തെങ്ങോലകളുടെ പ്രസക്തി സമൂഹത്തെ ബോധ്യപ്പെടുത്തുകയെന്ന ലക്ഷ്യത്തോടെയാണ് ശില്പശാല നടത്തുന്നതെന്ന് ബന്ധപ്പെട്ടവര് പറഞ്ഞു. വാര്ത്താ സമ്മേളനത്തില് സിപിസിആര്ഐ ഡയറക്ടര് ഡോ. ചൗഡപ്പ, ഫോക് ലാന്ഡ് ചെയര്മാന് ഡോ. ജയരാജ്, ശാസ്ത്രഞ്ജന് ഡോ. ജഗനാഥന്, ഡിവിഷണല് ഓഫ് സോഷ്യല് സയന്സ് ഹെഡ് ഡോ. സി.തമ്പാന്, പ്രിന്സിപ്പല് സയന്റിസ്റ്റ് ഡോ. മുരളീധരന് എന്നിവര് സംബന്ധിച്ചു.
